Logotipu CDTL

DILI, 17 outubru 2019 (TATOLI) – Tribunal Distritál Dili (TDD), ohin, hala’o primeira julgamentu ba iha arguido HAT nu’udar eis Prezidente Konfederasaun Desportu Timor-Leste (CDTL-sigla portugés) no arguida ALC nu’udar eis ofisial finansa CDTL.

Arguido/a nain rua deskonfia hanesan ko-autór material ho forma konsumada ba krime pekulatu ne’ebé previstu iha artigu 295, no krime falsifikasaun agravadu ne’ebé previstu iha artigu 303 no artigu 304 husi kódigu penal Timor-Leste nian.

Tuir faktu ne’ebé arrola husi Ministériu Públiku (MP) katak, iha tinan 2016 Governu liu husi Sekretáriu Estadu Juventude no Desportu (SEJD), asina akordu servisu hamutuk ho CDTL hodi fó apoiu orsamentu estadu nian hodi realiza programa tolu.

Programa elabora polítika nasionál ba desportu, ho apoiu orsamentu $32,000.00, programa apoiu fundus operasionál ba CDTL $100,000.00, programa festival nasionál desportu iha Munisípiu Bobonaro ho montante $312,000.00, orsamentu sira nee transfere ba iha konta bankária CDTL nian.

Rezultadu ezekusaun orsamentu tuir relatóriu husi CDTL ba Sekretáriu Estadu Juventude Timor Leste (SEJD) nota katak, osan hamutuk $312,000.00 ba programa festival komisaun organizadora konsege ezekuta $301,498.50, osan restu ho montante $14,501.60.

Iha loron 30 fulan Novembru 2016, iha Maliana, Komisaun Organizadora  entrega fila fali ba iha CDTL hafoin CDTL uza fali osan nee ho valor $3,899.50 hodi finansa fali atividade seluk. Nune’e osan nee hela de’it $10,602.00, maka arguido uza nia kompeténsia nu’udar prezidente hodi uza ba nia interese partikulár no too agora arguido seidauk fó fila ba iha kofre Estadu nian.

Akordu servisu entre SEJD ho CDTL katak, sei fó apoiu operasionál ba iha CDTL ho montante $100,000.00, iha loron 20 jullu 2016, SEJD halo transferénsia ho kuantia 40% ho montante $40,000.00 ba iha CDTL nia konta bankária, atu uza ba kustu operasionál durante periodu tinan 2016.

Tuir relatóriu husi CDTL hatudu katak, ezekuta ona $35,531.45, no sei iha balansu ho montante $4,468.55. Iha loron 26 setembru 2016, SEJD halo transferénsia ikus ho kuantia 60% ho montante $60,000.00 iha CDTL nia konta bankária no aumenta tan balansu husi transferénsia primeiru $4,468.55, total montante osan operasionál iha parte segundu hamutuk $64,468.55, tuir relatóriu ezekuta ho montante $54,195,70, balansu ikus ho montante $10,730.85.

Tuir relatóriu CDTL utiliza osan restu ba mós atividade seluk, no arguido sira mós uza nia kompeténsia utiliza ba nia interese partikulár.

Tuir akordu iha tinan 2016, SEJD sei fó apoiu orsamentu ho montante $32,000.00 ba CDTL hodi hala’o elaborasaun polítika nasionál desportu, maibé orsamentu nee ezekuta husi SEJD.

Arguido rasik deklara ba Tribuna deklara katak, husi orsamentu ne’ebé maka iha, utiliza ba iha programa tolu, elabora polítika nasionál ba desportu, apoiu fundu operasionál, no programa festival nasionál desportu iha Bobonaro.

Arguido rekoñese katak, osan restu husi programa tolu nee, hanesan $37,779.35, nia mós uza balu ba iha atividade desportu nian. Alende nee nia mós simu balu husi nia tezoureira, hodi utiliza ba interese privadu, ne’ebé nia la hatene nia montante.

“Osan restu nee ha’u uza duni balu ba iha ha’u nia atividade privadu, maibé ha’u la kalkula ona nia montante hira. Balu mós ha’u uza ba iha atividade atleta nian balu, ne’ebé la tau iha relatóriu,” deklara arguido iha sala julgamentu.

Arguido mós rekoñese katak, osan restu ne’ebé gasta ba atividade seluk, la tau iha relatóriu, no balu la gasta tuir saida maka determina ona. Tanba nee nia parte prontu, atu devolve hikas osan estadu nian.

“Ha’u prontu fó fila osan estadu nian, hahú husi loron ohin ba oin, aumenta tan tinan rua ha’u bele fó hotu ona,” tenik arguido.

Rona tiha husi arguido, tribunal deside hodi adia hikas ba loron seluk. Audiénsia julgamentu nee, prezide husi Juis Koletiva Edite Palmira, Ivan Suritay, Juis Estaziada Patricia de Fatima, Ministériu Públiku reprezenta husi Prokuradór Rogério Viegas, arguido hetan asisténsia legal husi Advogadu Privadu, Adérito Magno no Defensor Públiku, Sebastião Amado.

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here