Uniaun Estudante Universitariu Municipiu Baucau (UEUMB) realiza konferénsia imprensa tanba diskorda ho deklarasaun Prezidente Autoridade Munisipál Baucau nian ne'ebé fó sai katak maioria populasaun pursentu 80 asesu ona bee-moos. Foto Tatoli: Tomé Amado

DILI, 16 outubru 2019 (TATOLI)-Uniaun Estudante Universitáriu Munisípiu Baucau (UEUMB) diskorda ho deklarasaun Prezidente Autoridade Munisipál, Baucau (PAMB), António Guterres katak populasaun Baucau maioria asesu ona bee-moos no eletrisidade.

UEUMB konsidera katak populasaun sira iha Baucau kontinua halerik ba infraestrurura bázika hanesan bee-moos, eletrisidade, estrada, saúde no edukasaun.

Portavóz UEUMB, Gabriela Soares, deklara katak UEUMB iha vizaun no misaun hakarak hetan sosiedade Baucau ida ne’ebé prósperu, igual no hakmatek. Tanba ne’e mak UEUMB nunka tuur hakmatek kuandu populasaun Baucau oan sira kontinua moris iha halerik nia laran.

“UEUMB sempre oferese ideia kreativa no konstrutiva ba estadu liuhusi Autoridade Munisípiu Baucau atu bele atinje moris di´ak ba komunidade iha Baucau,” hateten Portavóz UEUMB, Gabriela Soares ba jornalista sira liuhusi konferénsia imprensa iha kampus Sentrál UNTL, kuarta (16/10/2019).

Nia reforsa, hanesan estudante no Baucau oan ne’ebé sempre akompaña prosesu dezenvolvimentu iha Baucau sente deklarasaun Prezidente Autoridade Munisípiu Baucau, António Guterres nian la pertinente.  Tanba peskiza ne’ebé UEUMB halo ona iha postu administrativu  Baucau Vila, área ne’ebé mak sei preokupa hela bee-moos mak Baucau Vila, (Vila Nova) no Gariuai. Maibé Autoridade Munsípiu Baucau deklara Baucau Vila laiha problema ho bee-moos úniku RSS sei iha problema uitoan.

“Komunidade loroloron kontinua lori jerigen hodi ba lalin bee-moos. Iha suku Gariuai, komunidade sira ba kuru bee-moos iha Aldeia Bahamori no Leloria ho Gerobak,” nia konsidera.

Nune’e mós, tuir Portavós UEUMB ne´e katak iha Venilale, Laga, Quelicai no Vemase  kontinua hasoru problema hanesan ne’ebé sempre la´o ba buka bee-moos.

Maske diskorda deklarasaun PAMB maibé UEUMB rekoñese seidauk iha dadus kona-ba populasaun ne´ebé asesu ona no seidauk asesu bee moos no eletrisidade. Entretantu, tuir deklarasaun UEUMB katak durante ne’e sira observa katak populasaun iha Munisípiu Baucau enfrenta problema bee moos.

Notísia relevante:Populasaun Baucau Maioria Asesu Bee-Moos

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here