Ministru Ensinu Superiór, Siénsia no Kultura, Longuinhos dos Santos. Imajen/TATOLI

DILI, 16 outubru 2019 (TATOLI)-Ministru Ensinu Superiór Siénsia no Kultura (MESSK), Longuinhos dos Santos hateten, maske ninia parte seidauk prevé orsamentu atu loke sidade universitáriu iha Munisípiu Aileu maibé faze kontratu ho kompañia tama ona prosesu.

“Agora ita tama ona iha faze kontratu ho kompañia maibé seidauk iha finalizasaun,” informa Ministru Longuinhos dos Santos ba jornalista sira hafoin enkontru Konsellu-Ministru, iha Palásiu do Govérnu, ohin

Governante ne´e akresenta, nia parte seidauk hatene kompañia ne´ebé mak sei hetan fiar atu aselera konstrusaun ba harii sidade universitária ne´e tanba prosesu ne´e rasik kabe ba kompeténsia Ministériu Obras Públika (MOP) nian.

Maske nune´e, MESSK ho MOP serbisu hamutuk hodi elabora termu referénsia ida molok hakat ba faze kontratu ho kompañia sira.

Agora orsamentu atu preve ba prosesu konstrusaun sidade universitária Aileu ne’e seidauk termina ninia montante tanba prosesu estudu viabilidade no dezeñu BoQ (Bill of Quantity) seidauk ramata.

“Se enkuantu prosesu rua ne’e mak konklui ona mak ita foin bele define ninia montante ka orsamentu,” friza Ministru Longuinhos.

Nia esplika, planu VIII Governu konstitunsionál nian atu hari sidade universitária Aileu ne’e parte integradu ida husi Universidade Nasionál Timor Lorosa’e (UNTL) nian bazea ba nesesidade país nian.

Ne’e duni sidade universitária Aileu ne’e atu define ninia akumulasaun estudante na’in hira ne’e governu sei hein rezultadu husi estudu viabilidade mak sei termina kuantidade no kursu hira mak sei loke iha ne’ebá.

Tuir Longuinhos katak akademikamente sei liuhusi diskusaun grupu no entrevista atu nune’e foin bele define kursu hira mak pertinente atu loke iha sidade universitáriu Aileu ne’e.

Notísia relevante:Harii Sidade Universitáriu, Prosesu La’o Hela

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here