Xefe Estadu Maiór Jenerál F-FDTL, Lere Anan Timur. Imajen Tatoli/Xisto Freitas

DILI, 16 outubru 2019 (TATOLI)—Líder istóriku sira pudia hamutuk no tenke prátika hikas konjugasaun esforsu iha ailaran no konsensu iha tempu ukun-aan ida-ne’e.

“Ha’u nu’udar Xefe Estadu Maiór Jenerál apela ba ita-nia líder sira katak hamutuk ba hanesan uluk iha funu, terus ho povu, mate ho povu, defende povu nia interese no nia direitu,” Xefe Estadu Maiór Jenerál FALINTIL-Forsa Defeza Timor-Leste (F-FDTL), Lere Anan Timur ba jornalista sira hafoin hala’o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Nia rekoñese katak uluk iha ailaran nia terus duni tanba povu mós terus maibé agora nia la terus ona—iha kareta Estadu, iha uma Estadu no manán osan fulafulan, maski nune’e povu kontinua terus.

“Kuitadu, ita-nia povu liuliu emprezáriu balun nia dívida sa’e maka’as. Povu baibain entaun aat liu. Entaun, pelumenus, ita hadomi ba,” nia subliña.

Lere informa katak líder istóriku sira-ne’e hela na’in-lima ka neen de’it, tan ne’e la difísil hamutuk.
“Ita-nia komunidade lamenta beibeik kona-ba líder sira-nia diverjénsia. Kuandu lamenta beibeik, to’o tempu ida sira sei la fiar ita,” Lere haklaken.

Eis líder rezisténsia ne’e husu ba jerasaun foun atu hatudu-aan katak bele ka lae.

“Se ami katuas sira la rona malu, imi hatudu-aan ba! Keta imi bele solusiona impase polítika ne’ebé iha. Ita lakohi situasaun nune’e nafatin. Ita besik atu tama iha tinan 2020, tan ne’e ita lakohi tinan 2017, 2018, 2019 no 2020 ita mak hanesan ne’e hela de’it ,” nia fó hanoin.

Líder foun, tuir nia, primeiru, tenke haraik-aan no halakon tiha arrogánsia no bainhira arrogánsia sei la rona malu hanesan agora akontese daudaun.

Jornalista: Julia Chatarina
Editór: Xisto Freitas

HAKEREK NO HATÁN

Please enter your comment!
Please enter your name here