Cesar, timoroan ne'ebe gosta promove hahán lokál. Foto/FB Dilicious Timor.

DILI, 16 outubru 2019 (TATOLI) – César Trinito Freitas Gaio (36), na’in ba restaurante Dilicious, enkoraja joven sira ne’ebé hakarak hala’o vida negósiu, komesa agora, tanba negosiu ne’e hanesan ita enxe bee ba kopu, entaun enxe neneik-neneik to’o kopu nakonu.

“Tanba ne’e maka joven sira hanoin kona-ba negósiu komesa agora maski hasoru difikuldade barak, maibé labele lakon korajen, kuandu liu ona difikuldade hirak ne’e hakat ona bá faze ida ita bolu fiar aan”, hatete joven husi Munisípiu Baukau ne’e iha Timor Plaza, ohin.

César Trinito hahú nia negósiu ho osan válor rihun $6 bainhira sai hanesan manán-na’in ba Kompetisaun Planu Negósiu Inovativu (KPNI) iha 2015 ne’ebé realiza hosi Institutu Apoiu Dezenvolvimentu Emprezariál (IADE) iha momentu ne’ebá.

Nia haktuir bainhira atu hahú negósiu ida la’ós buat ida fásil, konserteza katak hasoru obstákulu, maibé kuandu ultrapasa mosu ona fiar-aan, maske difikuldade barak sei  mai, maibé tanba iha ona auto konfiansa maka sei la tauk ona.

“Ha’u hanesan manán-na’in ba kompetisaun Planu Negósiu Inovativu iha tinan 2015 no hetan osan hamutuk rihun $6. Momentu ne’ebá ha’u hetan oportunidade hodi ba estuda kona-ba jestaun ospitalidade iha Nova Zelándia, ne’e mós esforsu hosi IADE, no ha’u halo peskiza lubuk ida iha ne’ebá”.

Bainhira filafali, César mai ho nia ideia inovativa halo food truck, ne’ebé tuir nia loloos ne’e atu halo karreta ho dapur iha laran maibé dada de’it ne’e, más tanba hetan fali hanoin foun entaun dezenvolve karreta ho kedan dapur iha laran.

César relata ho orsamentu rihun $6 ne’e mak halo food truck, komesa ho catering, neneik-neneik depois osan nia montante komesa aumenta konsege loke restaurante Dilicious Timor.

“Ne’e hosi ha’u-nia esperiénsia bainhira ha’u tuir kompetisaun planu negósiu inovativu hosi IADE”, afirma.

Nia hatutan bainhira loke ona restaurante ne’e difikuldade barak maka enfrenta tanba te’in hahán hosi produtu lokál, ne’ebé hahán lokál ne’e bolu dehan korente valór tempu ne’ebá ne’e laiha, hanesan fornesedór ba hahán laiha no nia tenke bá sosa rasik, komesa hosi animál to’o iha modo.

“Esperiénsia modo balu la fa’an hanesan marungi entaun ha’u bá sa’e rasik lori mai, hamoos rasik depois te’in, maibé grasa de Deus agora daudaun ha’u la bá sa’e ona no ema mak lori de’it mai”, César dehan.

Nune’e mós fornesedór animál hanesan ikan, manu, bibi agora ne’e la tun rasik ba sosa, no ema maka lori de’it mai. “Más uluk ha’u maka tun rasik bá sosa”, konta Cesar.

Foinsa’e timoroan ne’e afirma, ho prémiu hosi IADE loke restaurante Dilicious Timor ho ema na’in haat. Hosi tinan 2015 to’o agora, traballador restaurante ne’e hosi haat sa’e ba 18, maibé ne’e traballadór regulár, no traballadór kazuál ba catering hamutuk 30-resin no maioria lisensiatura.

Emprezáriu foinsa’e ne’e dehan, ho osan hosi IADE konsege loke restaurante boot iha Dili ne’ebé emprega timoroan barak, maibé seidauk deve osan hosi banku.

Notísia relevante : Hakarak Hahán Lokál, Koko Reseita Cesar Gaio

Jornalista; Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here