Karreta ida halai iha pasadeira leten. Imajen/Tatoli.

DILI, 16 outubru 2019 (TATOLI) – Xefe Departamentu Sinál no Tránzitu Diresaun Nasionál Tansporte Terrestre (DNTT) husi Ministériu Transporte no Komunikasaun, João Eugénio da Silva, husu ba motorista no kondutór sira atu respeita ema la’o ain bainhira hodi hakat liu zebra cross ka pasadeira

João Eugénio rekoñese iha motorista balun laiha konsiénsia bainhira lori karreta ho motór, tanba motorista sira la respeita sinál tránzitu, ida ne’e bele akontese asidente, tanba la kumpre ka la respeita pasadeira.

“Tanba ne’e ami husi DNTT kontinua husu ba motorista sira atu respeita kódigu estrada bainhira lori karreta no motór halai iha dalan”, dehan nia ba Ajénsia Tatoli via telefónika, ohin.

“Ami husu ba maluk la’o ain sira atu atravesa dalan karik tenke haree zebra cross maka liu, nune’e prevene asidente tráfiku, labele la’o kuandu laiha zebra cross atu atravesa”, katak.

Atu konsensializa nafatin motorista no kondutór sira nian konsiénsia hodi respeita nafatin regra, tinan oin sei otimaliza liután sosializasaun ba motorista sira no komunidade tomak.

Nune’e bele kumpre di’ak liu kona-ba lala’ok kódigu estrada bainhira lori veíkulu oinsá bele seguru no respeita sinál tránzitu sira.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here