Veteranu Oekusi, Zeferino da Crus Salu. Imajen Jogerjo Guterres

OEKUSI, 15 outubru 2019 (TATOLI) – Veteranu Rejiaun Administrativa Espesiál Oekusi Ambenu (RAEOA), Zeferino Salu, Constancio Suni no José Ote, prefere kandidatu Prezidente Autoridade (PA), tenke figura ne’ebé akumulativu.

Zeferino da Crus Salu hanesan Oekusi oan prefere kandidatu ida ne’ebé mai tenke akumula komponente hotu; Igreja, Estadu, komunidade, juventude no entidade sira seluk.

Seluk fali, tuir Salu mak aspirativu, katak ema hotu iha rejiaun ne’e bainhira hateke ba nia, fiar iha nia.

Terseiru, nia hatete ema ne’e tenke iha fleksibilidade, labele haree ba buat ida de’it, no haluha tiha buat seluk, ezemplu konsentra ba aspetu infraestrutura, maibé haluha dezenvolvimetu umanu, turizmu, kultura no seluktán.

Hanesan vetaranu, sei simu ho liman rua kualker sidadaun ne’ebé hetan fiar atu lidera RAEOA, husi ne’ebé de’it, naran katak nia Timoroan ida ne’ebé akumulativu. Tanba ne’e husu ba governu sentrál atu aselera prosesu nomeasaun.

Nia mós husik hanoin ba autoridade foun atu dezenvolve Oekusi bazea ba lia-fuan Zona Espesiál ba Ekonomia Sosiál Merkadu (ZEESM) Oekusi Ambenu.

Veteranu Oekusi, Costancio Suni. Imajen Jogerjo Guterres

Tuir Costancio Suni kandidatu autoridade tenke hatene karater atoni Oekusi no ema ekonomista, tanba bainhira la hatene karater Atoni, sei susar atu ukun to’o rohan, tanba karater atoni diferente.

Maski nunee, Suni konfia kualker sidadaun ne’ebé hetan fiar atu mai ukun Oekusi, bazea ba lei númeru 3/2014 ne’ebé públika iha loron 18 fulan-juñu kona-ba kriasaun autoridade RAEOA, define, sidadaun Timor, moris iha Timor, la define katak tenke Oekusi oan, naran katak, ema ne’e tenke hatene karateristika ema atoni, no ne’e garante buat hotu sei la’o di’ak no susesu.

“Karater atoni ne’e la muturabu, maibé bainhira hala’o servisu mak la konsidera nia, la respeita nia hanesan umanu, nia sei la ko’alia sai, maibé nia sei julga ita iha tempu ida”, hateten Costancio.

Nia esplika bainhira atu halo dezenvolvimentu ho susesu, tenke respeita atoni nu’udar umanu, respeita ninia patrimoniu ho aproximasaun ne’ebé di’ak, bainhira buat hira ne’e la’o, ba Oekusi laiha problema.

Veteranu ne’e husu ba governu sentrál atu anúnsia ona naran kandidatu foun tanba Oekusi agora krize lideransa.

Tuir nia, kontinuasaun ba projetu ZEESM ba tinan lima mai tenke hadi’a estrada ne’ebé liga kapitál ba área rurál sira.

Alende ne’e governu sentrál mós tenke hanoin ona oinsá mak dada investór sira ineste, atu bele utiliza ka bele hetan reseita husi infraestrutura baziku ne’ebé iha ona hanesan portu, aeroportu no seluk tan.

Vetaranu no lia-nain Oekusi, José António Ote. Imajen Jogerjo Guterres

Veteranu no lia-nain, José António Ote, prefere ema ne’ebé demokrátiku, maibé hirak ne’e depende ba partidu polítiku sira ne’ebé ukun ho Aliansa Mudansa ba Progresu (AMP).

Haree ba polítika desentralizasaun, tuir nia haree autoridade tenke ema lokál ne’ebé koñese povu no rai Oekusi, tanba ko’alia parte integradu Estadu Timor-Leste, maibé ne’e depende ba governu sentrál. Figura, nia afirma bazea ba motto hosi povu, ho povu, no ba povu.

Kona-ba dezenvolvimentu ba tinan lima oin mai, nia dehan depende ba programa anuál no orsamentu ne’ebé lejislativa sira deside.

PM Taur Seidauk Foti Desizaun Nomea Ema Foun Lidera RAEOA

Arsénio Bano Asume Kna’ar Nu’udar Prezidente RAEOA Interinu Durante Loron 120

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here