Verifikadór sira halo juramentu iha salaun RAEOA, ohin objetivu mak halo servisu tuir lei. Imajen Tatoli/Cipriano Colo

OEKUSI, 15 outubru 2019 (TATOLI) – Verifikadór (avaliadór) dadus kombatente libertasaun nasionál 54 iha Rejiaun Administrativa Espesiál Oekusi Ambenu (RAEOA), ohin iha salaun RAEOA, halo juramentu hodi verifika dadus sira ne’ebé rejista iha 2009, totál 3.961 ho loloos.

Prezidente Komisaun Omenajen, Virgilio Smith, ne’ebé akompaña prosesu ne’e ba Tatoli hatete ekipa validasaun sei hahú servisu iha munisípiu hotu iha loron 15 fulan-outubru 2019, ho sistema ne’ebé rigór.

“Rejistu iha 2009, munisípiu hotu sei halo de’it validasaun iha munisípiu, no bainhira haruka ona ba nasionál, garante katak sei la iha tan reklamasaun. Tanba ne’e, husu verifikadór sira atu verrika didiak”, hatutan Smith iha salaun RAEOA Santa Rosa, ohin.

Bainhira verifikadór sira ajuda falsifika dokumentu ba kandidatu, na’in rua (kandidatu no verifikadór) sei hetan sansaun maka tenke lakon direitu ba pensaun no sei hetan kastigu tuir lei haruka hanesan haktuir iha lei númeru 3/2006, artigu 19.

Durante prosesu, Virgilio dehan públiku iha ‘liberdade’ atu kontesta hodi halo komentáriu no razaun kuandu haree realidade sira ne’ebé la tuir lei.

Verifikadór sira sei uza giaun ne’e hodi halo verifikasaun ba dadus.

Sekretáriu sub-rejiaun Haksolok Oekusi, Martinho da Cunha ‘Mala’, agradese tanba komisaun nasionál fó oportunidade ba ekipa iha RAEOA atu halo verifikasaun. “Husu verifikadór sira verifika didiak, nune’e bele la’o to’o rohan”, Mala fó atensaun.

Prosesu ne’e bazea ba artigu 13 ne’ebé ko’alia kona-ba sertidaun, katak aprova rejistu ne’e atu rekerente sira kontesta sira nian direitu ba partisipasaun iha luta, inklui data, durasaun, no organizasaun ne’ebé sira dezempeña funsaun.

Tuir dadus, kandidatu benefisiáriu veteranu husi 18 iha RAEOA ne’ebé rejistadu iha segundu periúdu 2009 hamutuk 3.961.

Husi númeru ne’e, suku Kosta 367, Nipane 68, Lalisuk 404, Cunha 395, Naimeko 87, Bobokase 144, Lifau 72, Taiboko 376, Usitasae 301, Usitakeno 164, Bobometo 456, Abani 240, Malelat 161, Suniufe 292, Lelaufe 83, Usitaku 203, Beneufe 79.

Tuir kalendáriu ba verifikasaun dadus iha Oekusi ne’ebé fó sai husi komisaun omenajen supervizaun rejistu no rekursu asuntu kombatente libertasaun nasionál katak suku Costa sei hala’o iha loron 15-23 outubru 2019.

Suku Nipane sei realiza iha loron 24-25 outubru 2019, suku Lalisuk ho suku Cunha sei hala’o iha  26 outubru to’o 16 novembru 2019.

Suku Naimeko ho Bokokase sei akontese iha 18 -22 novembru 2019, suku Lifau ho Taiboko sei realiza iha 23 novembru to’o 4 dezembru 2019.

Suku Usitasae sei hala’o iha 5 dezembru 2019 to’o 13 dezembru 2019. Usitaqueno 06 – 9 janeiru 2020, Bobometo 10-21 janeiru 2020, Abani 22 – 27 janeiru 2020, Malelat 28-31 janeiru 2020.

Suniife 1-7 fevereiru 2020, Lelaufe 8-10 fevereiru 2020, Usitaku 11-15 fevereiru 2020, Beneufe 17-18 fevereiru 2020, no Banafi 19-20 fevereiru 2020.

Veteranu 54 Husi RAEOA Preparadu Verifika Lista Kandidatu Benefisiáriu Kombatente 3.961

Jornalista: Cipriano Colo

Editora: Rita Almeida

HAKEREK NO HATÁN

Please enter your comment!
Please enter your name here