Xefe Suku Camea, Matos da Costa. Foto TATOLI: Felicidade Ximenes

DILI,15 outubru 2019 (TATOLI)-Xefe Suku Camea, Matos da Costa hateten, aldeia rua hanesan Aldeia Ai-lelehun no Lenukhun iha Suku Camea dezde tempu portugés, iha okupasaun Indonézia no bainhira indepedénsia aldeia rua ne´e susar ba bee moos maibé iha de´it bee-matan ida ne´ebé husik hela husi beiala sira no tuku haat madrugada de´it komunidade sira nakonu ona iha bee-matan ne´e hodi hadau malu kuru bee .

“Kuru uza akua no depois balun kuru uluk hein bee ne’e moris fali mak balun kuru fali mas ita ko´alia ita-nia estudante sira katak futuru iha sira-nia liman mas presiza mós tau kondisaun ba sira hodi tau kbiit ba sira hodi estuda,” dehan Xefe Suku Camea Matos da Costa, ba jornalista sira.

Autoridade lokál ne´e haktuir katak sira preokupasaun ne´e sira hato´o bebeik ona ba governu maibé seidauk iha resposta tanba ne´e sira sente triste tanba konsidera katak Camea pertense ba Dili maibé sai vítima ba dezenvolvimentu ida ne’e.

“Komunidade ida ne’e mós merese para moris di’ak maibé tanbasá mak sira labele hetan bee moos”.

“Governu sira lalika preokupa de´it sira-nia karreira polítika ba sira-nia fatin maibé haree mós preokupasaun ba ema nia nesesidade bázika. Ha´u hanesan xefe suku triste tanba ha´u nia aldeia rua ne’e mak seidauk asesu ba bee mos dezde okupasaun portugés ho indonézia to´o ita indepedénsia mós bee la iha mas ne’e pertese Dili mas la fó atensaun ba ida ne’e,” hateten xefe suku Camea ne´e.

Ko´alia Ho Tanis

“Ohin loron mós selebra loron feto rurál mas ema konsidera imi feto rurál la´ós feto kapitál tanba ema feto kapitál ema moris ho di´ak maibé kuitadu imi kondisaun ho difisil tebes tanba feto kapitál haris loron ida dala tolu maibé kuitadu inan feton sira iha aldeia Ai-lelehun ho Lenukhun susar atu asesu ba bee moos, atu kuru han nian mós susa,” Xefe Suku Camea, Matos da Costa, ko´alia ho tanis.

Autoridade lokál ne´e dehan tan: “Ha´u tanis tanba ha´u-nia inan feton sira iha ne’e tutur bee no hulan de´it no fatin ida ne’e mós ita-nia lutadór sira mai haree maibé to´o agora bee ne’e la mai tanba saida? tanba komunidade sira hela iha ne’e atan ka saida? ka la´ós nasaun nia ema? la´ós ema hotu dehan dezenvolvimentu la´o ona maibé ba ha´u xefe Suku Camea dehan katak seidauk la´o ha´u ko´alia ho matan-been katak komunidade nia realidade mak hanesan ne’e duni”.

“Labarik sira ne’ebé eskola iha ne’e mós dala ruma mai laharis, bee la iha, kuitadu ita ko´alia sira mak futuru oinsá ita haree futuru ida ne’e ita labele husik sira moris hanesan ne’e tama ona tinan 20 indepedénsia maibé sei tutur bee,” konsidera Xefe Suku, Matos da Costa hodi reforsa tan.

Nia informa, Suku Camea iha aldeia 13 maibé suku rua de´it, Ai-lelehun, Lenukhun, mak seidauk asesu bee moos. Lamentasaun hirak ne’e tanba realidade sira kuru bee, tutur no lalin bee husi rai naruk. “Loloos moris iha kapitál Dili labele akontese hanesan ne´e maibé balun uza karosa ka tiga roda maibé balun lae. Preopukasaun ne’e la´ós mak foin hato’o maibe hato’o bebeik ona“.

Nia hatutan, bee ne’e iha beiala nia tempu bee-matan ki´ikoan ida ne’ebé husik hela maibé tempu bailoron ne’e sira kuru too bee ne’e maran. Depois sira hein to´o bee ne’e iha, sira kontinua kuru no bee mos laduun di´ak tanba sira hadau malu ho animál sira ne’ebé hamrok.

“Tinan barak ona komunidade Ai-lelehun no Lenukhun moris hanesan ne’e. Iha aldeia Lenuk hun ne’e totál uma kain 200 resin maibá totál família ne’e kuaze 600 resin entaun agora Ai- lelehun ne’e fahe parte rua ida ba liman loos no ida ba liman karuk ida ne’e mós familia uma-kain hamutuk 90”.

Iha biban hanesan, Xefe Suku Camea, Matos da Costa informa mós katak aldeia rua ne´e alende susar bee moos iha mós difikuldade ba estrada no liña eletrisidade. Liña eletrisidade kompaña ke´e maibé paradu hela, entaun provizoriamente sei uza ahi privadu, sira dada rasik tuir kbiit rasik.

Iha fatin hanesan, Komunidade Maria Fatima Ximenes hateten, sira susar tebes ba bee moos. “Ami iha aldeia ne’e susar liu ba bee moos hanesan ami-nia oan sira tun ba rai naruk kuru, entaun sira ba eskola tarde no sira merenda sira hit akua ne’e ida ida, se ami-nia oan mak iha uma laran na´in lima pasiénsia hit jerken rua ba eskola entaun ami araska loos ba bee ne’e”.

Alende bee moos, tuir Komunidade Maria Fatima Ximenes katak iha aldeia rua, dook husi Klínika. “Nu’udar ami inan isin rua susar ba klínika tanba ami inan kanotak moras, pasiénsia ambulánsia la mai entaun tau ami ba kadeira hulan ami ba klínika hodi partus . Ami iha ne’e asesu klínika, iha klínika Becora, ne’ebé lao lubuk ida mak foin to´o ne’ebá,” nia haktuir.

Notísia relevante:Rúsia Estabelese Kooperasaun Defeza ho Timor-Leste

EBF Ai-lelehun Camea Susar Asesu Bee Moos

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here