Koordenadór AIFAESA, Abílio Oliveira Sereno. Imajen/Jogerjo Guterres.

DILI, 15 outubru 2019 (TATOLI) – Koordenadór Autoridade Inspesaun no Fiskalizasaun ba Atividade Ekonómika no Sanitária (AIFAESA), Abílio Oliveira Sereno, hateten Ministru Koordenadór Asuntu Ekonómiku (MKAE) interinu, Fidelis Leite Manuel Magalhães, hato’o prontidaun ba pedidu AIFAESA hodi estabelese laboratóriu.

Abílio Sereno hatutan MKAE aseita hodi fó apoiu tomak ba planu ne’ebé AIFAESA iha ba tinan ohin hodi halo laboratóriu ida nune’e bele kontrola hahán husi rai-li’ur tantu rai-laran.

“Ami aprezenta preokupasaun maka oinsá Governu apoia ami-nia proposta hodi halo laboratóriu no horiseik iha vizita ne’e ministru hato’o ona nia prontidaun hodi fó apoiu tomak ba pedidu ami nian”, dehan nia ba jornalista sira iha knaar fatin Matadouru, ohin.

Nia dehan laboratóriu teste ba hahán sai hanesan AIFAESA nian programa prioridade tinan oin tanba ida ne’e importante karik aban bainrua kuandu AIFAESA tun hodi halo inspesaun ba hahán importadu iha ona laboratóriu nune’e hafásil AIFAESA bele halo identifikasaun ida ne’ebé maka prazu liu no ida ne’ebé populasaun bele konsome.

“Ministru mós hatudu nia seriedade ba kestaun ida ne’e katak AIFAESA presiza iha laboratóriu ida ba kontrolu hahán sira no nia mós promete sei tranzmite ida ne’e ba Primeiru-Ministru nune’e bele defende orsamentu AIFAESA nian ba harii laboratóriu tinan oin nian bele pasa iha Parlamentu”, dehan Abílio Oliveira Sereno.

Bainhira laboratóriu laiha difikulta AIFAESA atu halo teste hodi halo identifikasaun ba hahán sira ne’ebé nesesáriamente atu halo kuandu deskonfia liuhusi inspesaun ne’ebé AIFAESA halo.

Iha fatin hanesan, Diretór Operasaun AIFAESA, Gabriel da Costa, realsa ekipamentu ne’ebé maka nesesita liu iha laboratóriu mak ekipamentu ba esperimentu teste hahán hanesan ayam potong, ikan, bee sira atu garantia ba nia kualidade nune’e mós ba hahán sira seluk hanesan foos no manu-tolun.

Tanba daudaun ne’e, produtu barak maka haruka husi estranjeiru, nune’e presiza laboratóriu ida atu halo esperimentu ba hahán sira nune’e bele garantia kualidade no mós asegura saúde públika.

Nia hatutan rekursu umanu ne’ebé maka agora AIFAESA iha sufisiente atu jere laboratóriu bainhira harii. Orsamentu ba kriasaun laboratóriu hamutuk montante millaun $2.

Jornalista : Natalino Costa

Editora : Maria Auxliadora

HAKEREK NO HATÁN

Please enter your comment!
Please enter your name here