Lansamentu Livru Lei Umanitáriu Internasionál Iha Timor- Leste no Tinan 70 Konvensaun Jenevra. Imajen/TATOLI

DILI, 15 outubru 2019 (TATOLI)Parlamentu Nasionál (PN) hamutuk ho Cruz Vermelha Timor-Leste (CVTL) iha tersa ne’e, halo lansamentu ba Livru Lei Umanitária.

Prezidente CVTL, Madalena Hanjam, hateten lansamentu Livru Lei Umanitáriu ne’e la’ós halo de’it iha Timor-Leste (TL) maibé nasaun barak iha mundu mós lansa ona livru ne’e.

Prezidente Cruz Vermelha Timor-Leste (CVTL), Madalena Hanjam. Imajen/TATOLI

“Lei Umanitáriu ne’e lansa ona iha mundu tomak tanba kualker nasaun ida tenke kumpre regra umanitáriu internasionál, liuliu ba Lei Umanitáriu ne’ebé regula tuir regra no asuntu ne’ebé refere”, tenik Madalena iha resintu PN, hafoin seremónia lansamentu livru.

Tuir nia, livru ne’e iha funsaun barak hanesan haree mós ba ema ne’ebé iha funu-laran sai vítima no suspeitu.

“Bainhira laiha funu mós livru ne’e la’o nafatin atu halo prevensaun no halo treinamentu iha ita-nia nasaun laran liuliu ba situasaun sira ne’ebé iha relasaun ba seguransa no forsa”, nia dehan.

Madalena Hanjam hatutan: “Iha ita-nia nasaun, bainhira Polísia no Forsa serbisu hamutuk atu halo atuasaun ruma tenke kumpre regra ne’e. Maibé ita-nia nasaun agora daudaun la monu ba konflitu ne’ebé bo’ot tanba ne’e CVTL kontinua haklaken advokasia hodi ajuda nasaun”.

Objetivu hala’o lansamentu livru ne’e iha PN tanba deputadu sira maka importante atu halo advokasia, respeitu lei no bainhira aloka orsamentu tenke respeita Lei Umanitáriu Internasionál.

“Ohin hanesan kontente ida bele lansa ona livru no tempu hanesan mós inaugura  tinan-70 Konvensaun Jenebra” Prezidente CVTL akresenta.

Nune’e, nia husu ba membru PN hotu tenke komprende didi’ak Livru Lei Umanitáriu ne’ebé lansa atu bele foti desizaun ruma ho atensaun no kuidadu.

Parte seluk, Prezidente Parlamentu Nasionál (PPN), Arão Noé de Jesus da Costa Amaral, hateten lansamentu livru ne’e tanba bazeia ba tratadu ne’ebé TL ratifika ona.

Prezidente Parlamentu Nasionál, Arão Noé de Jesus da Costa Amaral. Imajen/Tatoli

“Lansamentu livru ne’e tanba kompromisu tratadu sira ne’ebé Timor-Leste ratifika ona atu oinsá bele sai hanesan referénsia ba deputadu sira atu foti desizaun ruma ba nesesidade povu-nian tenke ho kuidadu”, tenik Arão Noé.

PPN dehan, hafoin seremónia ne’e ramata sei intrega ida-idak ba deputadu hotu nune’e bele iha koñesimentu kle’an atu foti desizaun hanesan liga ba direitu umanu no CVTL nia funsionamentu tuir lei internasionál.

“Tuir ita nia konstituisaun artigu 9 hateten, sira ne’ebé halo ona ratifikasaun ne’e sai ona karaktér hanesan lei. Ho nune’e, maka Timor-Leste tenke kumpre kuandu ratifika ona tratadu sira”, nia subliña.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here