Sekretáriu Estadu Formasaun Profisionál no Empregu, Julião da Silva. Imajen/Mídia SEFOPE.

DILI, 15 outubru 2019 (TATOLI) – Sekretáriu Estadu Formasaun Profisionál no Empregu, Julião da Silva, hateten iha 2020, kria hotline center ida atu halo tratamentu no atendimentu jerál ba servisu traballadór nian iha rai-laran no rai-li’ur.

“Ita bele estabelese sistema informasaun ka komunikasaun ida hotline center ka call center ida para ema hotu-hotu bele husu informasaun, complain ka hato’o keixa ruma la presiza mai iha Dili”, SEFOPE Julião da Silva iha knaar fatin Kaikoli, ohin.

SEFOPE dehan hotline center ne’e kria atu halo tratamentu jerál ba servisu traballadór nian hanesan iha prosesu rekrutamentu traballadór ba rai-laran no rai-li’ur, kazu disputa laborál ou kazu saida de’it nakloke simu no responde.

“Se de’it mak iha munisípiu hakarak hato’o keixa, complain ka buka informasaun ruma bele telefone mai no la presiza mai Dili”, katak.

Nia dehan liuhosi sistema hotline ho nia sistema baze dadus ida atu SEFOPE bele responde liuhosi kada diresaun ne’ebé responsabiliza.

Julião da Silva informa sobre asuntu ne’e ko’alia ona ho Teknolojia Informasaun no Komunikasaun (TIC Timor, IP, sigla portugés) atu estabelese rede internét hodi di’ak hodi bele fasilita kriasaun sistema ne’e.

“Ita ko’alia ona ho TIC para estabelese lalais ita-nia rede internét ho di’ak ona, ita bele hahú ona iha tinan oin (2020), hodi bolu hela operadór Telemor ho Timor Telecom atu realiza sistema hotline center ne’e”, katak.

Notísia relevante : KAK Rekomenda SEFOPE Kria SOP no Komunikasaun iha Prosesu Rekrutamentu Traballadór

Jornalista: Florencio Miranda Ximenes 

Editora : Maria Auxiliadora

HAKEREK NO HATÁN

Please enter your comment!
Please enter your name here