Ilustrasaun

DILI, 15 outubru 2019 (TATOLI)-Ospitál Nasionál Guido Valadares (HNGV), liuhusi sala sirurjiaselebra loron mundiál anestezia ne´ebé kada tinan realiza iha loron 16 outubru, ho atividade oioin durante loron tolu, hahú horseik no sei ramata aban.

Loron primeiru, selebra ho espozisaun públika kona-ba saida mak enfrenta iha sala sirurjia bainhira ema ida atu hahú operasaun. Loron daruak, selebra iha Sentru SOLS (Sciences of Lifes Systems) ho atividade hanorin no fahe koñesimentu ba joven sira atu atua ema ka pasiente ruma bainhira nia fuan  para no ko´alia mós kona-ba anastezia nian.

No, loron datoluk (aban), sei selebra ho atividade hanesan konferénsia internasionál iha Hotel Timor no sei partisipa husi lider timoroan sira no doadór nasionál no internasionál, ne´ebé sei ko´alia kle´an liután kona-ba anestezia no espetasaun Timor-Leste nian kona-ba anestézia ne´e rasik oinsá.

“Anestezia mak hanesan espesiál ne’ebé importante tebes maske foin dezenvolve iha tinan 174 até agora maibé ho avansa tebes ho nia avansa ida ne’e bele permite katak kolega sira sirurjiaun halo manobra ho operasaun ne’ebé komplikadu tanba ita hotu hatene katak kualker operasaun ida anestezia sei bius ema, la tolera,” dehan Anestezista, Médiku Colombianos da Silva ba media sira iha sala operasaun, segunda ne´e (14/10/2019)

Médiku timoroan ne´e esplika, anestezia nia funsaun loloos atu prepara pasiente atu opera. “Entaun ami haree pasiente antes atu opera, ami haree nia kondisaun, keta pasiente iha moras ruma ne’ebé agrava entaun ami koko nia tensaun hodi kontrola nian. Durante ami halo operasaun ami halo pasiente ne’e dukur, ami halo nia kalma, ami halo nia la sente moras atu nune’e kolega sira parte iha sirurjaun bele opera. Depois opera hotu tiha ami kontinua mantein nafatin nia, ami asegura katak nia labele sente moras no ami haree katak pasiente ne’e kondisaun di´ak ami haruka nia ba sala (operasaun) maibé karik nia kondisaun komplikada durante iha operasaun laran karik ami manage (jere) pasiente ba to iha ICU (Intensive Care Unit)”.

“Ami-nia espesialidade ne’e kobre buat barak tanba husi parte sirurjiaun  em termos de liafuan médika, sirurjiaun sira konsentra liu ba parte anatomia no husi anestezia sira mak haree ba parte fisiolojia katak durante opera ami asegura pasiente ne’e dada iis di´ak, toba dukur no labele mate,” reforsa tan médiku ne´e.

Anestezista Colombianos da silva esplika tan, anestezia mós agora daudaun iha mundu modernu la´ós konsetrasaun de´it ba sala operasaun (sirurjia) maibé mós envolve iha sala emerjénsia nian no iha sala ICU ne’ebe mak haree ba pasiente ne’ebé mai ho moras króniku hanesan isin-lolon kankru, moras ruin, moras uat, entaun ida ne’e mós anestezia sira nia papel importante ida.

Iha Dezafiu

“Situasaun iha ita-nia nasaun ita labele bosok ita iha dezafiu barak maske nune’e ami anistezia sira la redús ami-nia atensaun maibé iha momentu balun ai-moruk limitadu balun autostock maibé koñesimentu ne’ebé ami iha, ami anestezia sira, ami doutór no enfermeiru sira, ami bele buka maneira oinsá buka ai-moruk seluk ne’ebé mak ho kualidade hanesan atu asegura pasiente sira ne’ebé simu atensaun másimu katak loos tanba ita enfrenta desafiu hirak ne’e maibe husi tinan 2019 janeiru to fulan outubru ne’e ita opera 2.300 ne’ebé mak ita halo iha sala operasaun nian iha HNGV la sura ospitál referál husi Munisípiu Maliana, Maubesi no fatin sira seluk tan,” dehan médiku timoroan.

Nia informa, kondisaun agora daudaun sala operasaun HNGV mak iha espesialista hamutuk na´in tolu ne’ebé serbisu hamutuk ho Xina, Cuba no Austrália.

“Dezafiu ne’ebé mak ami hasoru mak hanesan ita-nia pasiente dala barak mai tarde no moras agravadu loos. Ezemplu, ita tenke halo, atua no onestu liután no ezemplu seluk mak dezafiu ho ami-nia pesoál saúde ne’ebé mak tenke servisu ho ami-nia númeru limitadu tebes maibé númeru operasaun aumenta maka’as”.

HNGV Opera Ona Pasiente 2.300

Médiku Colombianos da Silva haklaken, prátika anestezia risku tebes tanba kualker komplikasaun bele akontese durante halo operasaun. Maibé sira-nia estatistika hatudu katak tinan ida ne’e de´it, husi fulan janeiru to´o outubru agora operasaun kuaze 2.300 no iha operasaun sira ne’e ema mate mak na´in rua de´it no mate na´in rua ne’e la´ós  sira-nia atuasaun mak laduun di´ak maibé na´in rua ne’e mai ho kondisaun ne’ebé mak grave no na´in rua ne’e durante operasaun la aguenta no sira mate.

Moras ne’e moras urjénsia mak dala barak ita hare ba ita nia inan isin rua ne’ebé mak partu labele no mós dalaruma asidente iha Dili laran mós barak operasaun ne’ebé efetivu antes opera ne’e husi kakorok no iha moras kabun laran moras oioin  em termos de emerjénsia ita halo barak liu ba inan isin rua.

Anestezista timoroan ne´e relata, númeru anestezia sira la to´o tanba tenki karega funsionáriu sira, la servisu tuir oras ne’ebé mak iha katak semana ida tenei 40 oras no depois haree ba sala operasaun la sufiente.

“Ita nu’udar sentru entaun ita tenke simu ema moras sira husi fatin -fatin no agora daudaun sala operasaun iha tolu de´it tanba sala tolu ne’e la sufiente ba ema no loron ida simu pasiente ne’ebé opera hamutuk ema hitu ba  sanulu. Ami nia vizaun ba futuru mak ema ne’ebé mak mai hetan anistezia nian katak mai ho kontente, fila mós ho kontente, mai ho moras ida, mai ho kolega husi sirurjiaun ho ami atende sira depois operasaun no ami asegura katak sira la sente moras,” nia konklui.

Entretantu, tuir Anestezista Colombianos da Silva informa katak tinan oin Sala Sirurjiaun, HNGV sei aumenta tan anestezista timoroan na´in tolu no sei konta hamutuk ho enfermeiru anatezista hamutuk na´in 25.

Jornalista :Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here