Prezidente Autoridade Munisipál Bobonaro, Zeferino dos Santos. Imajen Tatoli/Evaristo Soares Martins

BALIBO, 15 outubru 2019 (TATOLI)–Administrasaun Munisipál Bobonaro planeia atu harii monumentu ba jornalista estranjeiru na’in-lima ne’ebé militár Indonézia oho iha Postu Administrativu Balibo, iha tinan 1975.

“Ami iha ona planu atu tau iha Balibo. Primeiru, atu halo monumentu tanba mate iha ne’e la’ós sira (jornalista) de’it, maibé ita-nia joven lubuk ida mós mate ba ita-nia luta libertasaun ida-ne’e,” Prezidente Autoridade Munisipál Bobonaro, Zeferino dos Santos, ko’alia asuntu ne’e iha ámbitu komemorasaun Balibo Five ba tinan 44, iha Postu Administrativu Balibo, ohin.

Lee mós: Jornalista Na’in-lima Hola Parte iha Istória

Nia dehan, se Parlamentu Nasionál aprova planu ne’e iha orsamentu 2020, entaun iha tinan 2020 hahú konstrui monumentu ida iha Balibo.

Nia esplika, jornalista na’in-lima ne’e hala’o kna’ar hodi transmite povu Timor nia terus ba mundu, maibé jornalista na’in-lima ne’e sai vítima ba rai ida-ne’e.

Prezidente Autoridade Munisipál Bobonaro ne’e hein katak ho selebrasaun Balibo Five ba tinan-44 ne’e motiva jornalista sira bele hala’o kna’ar ho profisionál no livre atu ba ne’ebé de’it.

Entretantu, Sekretáriu Estadu Komunikasaun Sosiál, Merício Akara, orgullu ho planu Administrasaun Munisipál Bobonaro nian.

“Ideia di’ak. Ne’e hatudu katak ita agradese sakrifísiu ne’ebé jornalista na’in-lima oferese”, katak Merício Akara.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here