Transaporte aereo husi Indonézia, TransNusa Aviation Mandiri ka naran badak TransNusa ho númeru 72-600, ohin halo aterajen iha aeroportu internasionál Nicolau Lobato. Imajen/Egas Cristovão

DILI, 14 outubru 2019 (TATOLI) – Aviaun TransNusa ne’ebé halo operasaun rute Dili-Kupan, Kupan-Dili sei aumenta frekuénsia semo husi semana ida dala rua ba tolu tanba haree ba númeru pasajeiru ne’ebé sa’e.

Prezidente Administrasaun Autoridade Aviasaun Civil Timor-Leste (AACTL), Rosália Ximenes Varela

Prezidente Autoridade Aviasaun Sivíl Timor-Leste (AACTL), Ana Rosália Ximenes Varela, informa AACTL simu ona pedidu husi TransNusa atu aumenta volume semo ne’e.

“Ami simu sira-nia pedidu horiseik tan sira hakarak aumenta tan frekuénsia semo Dili-Kupan. Hanesan autoridade ne’ebé responsavel ba aviasaun nian ami fasilita hodi hasai autorizasaun tuir sira-nia pedidu para sira semo”, dehan nia ba Ajénsia Tatoli iha Kaikoli, ohin.

Ana Rosália adianta katak antes ne’e, aviaun TransNusa halo operasaun semana ida dala rua iha loron segunda no sesta.

“Maibé, agora sira husu aumenta tan frekuénsia semo semana ida dala tolu iha segunda, kuarta no sesta tuir sira-nia pedidu mai ami tanba haree ba númeru pasajeiru ne’ebé aumenta”, dehan Ana Rosália.

Pedidu TransNusa ne’e rasik husi parte AACTL sei fó autorizasaun hahú 16 outubru hodi aumenta sira-nia frekuénsia semo.

Iha 14 juñu ne’e, Aviaun TransNusa reativa nia vou Kupan-Dili no Dili-Kupan. Oráriu sasemok TransNusa ne’e mak hosi Kupan-Dili iha segunda no sesta iha tuku 08:48 oras ne’ebá no to’o iha Dili tuku 10:45 oras Timor-Leste, entretantu vou hosi Dili-Kupan, tuku 11:15 oras Timór no to’o iha Kupan, tuku 11:11 oras ne’ebá.

Vou regulár dahuluk ne’e liuhusi kooperasaun entre kompañia aérea TransNusa ho Air Timor. Kapasidade vou TransNusa ne’e bele tula pasajeiru hamutuk 72.

Iha lansamentu ba vou ida ne’e, Diretór Trans Nusa, Risnandi Saepurachman, dehan vou sei dala rua de’it iha segunda no sesta, bainhira haree mak sei di’ak liu mak sei dezenvolve nia frekuénsia ne’ebé barak liu, atu hakarak iha loron ida bele sai ba loroloron.

Iha 2017, TransNusa halo ona lansamentu ba vou dahuluk mai Timor-Leste, maibé hapara tiha nia atividade hafoin semo dala hira tanba problema sosiál no polítika iha momentu ne’ebá.

Notísia relevante : TransNusa Reativa Vou Kupan-Dili Iha Semana Ida Dala Rua

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here