Biodiversidade Timor-Leste. Foto: Na Raiz - WordPress.com

DILI, 14 outubru 2019 (TATOLI) – Sekretáriu Estadu Ambiente (SEA) no Gabinete Primeiru-Ministru (GPM) sei halo diskusaun finál hodi hadi’a termu legál balun iha dekretu lei ba biodiversidade, hafoin entrega ba Prezidente Repúblika hodi halo promulgasaun ou veta.

“Ita-nia asesór gabinete Primeiru-Ministru hateten presiza hadi’a termu legál balun tanba ne’e ami tenke ba halo diskusaun no halo redasaun finál, hafoin lori ba Prezidente Repúblika atu promulga”, Diretór Protesaun no Konservasaun Biodiversidade SEA, Rui Pires, ba Ajénsia Tatoli iha knaar fatin Bebora-Dili, ohin.

Dekretu Lei Biodiversidade ne’e, atu proteje rekursu iha Timor-Leste, no salva guarda rekursu biodiversidade atu uza ba sustentabilidade dezenvolvimentu ekonómiku iha rai ida ne’e.

Nia afirma, dekretu lei ne’e mós garante protesaun no konservasaun ba rekursu biodiversidade (flora no fauna) ne’ebé besik atu mohu ona iha Timor-Leste.

“Ita sei uza lei ne’e hodi garante no proteje para ema labele estraga biodiversidade iha ita-nia rai”, katak.

Nune’e, nia dehan ekipa jurídiku SEA nia hahú prepara aan atu ba halo diskusaun ho GPM hodi finaliza lalais lei ne’e.

Biodiversidade iha Timór konsidera hanesan rai ida ne’ebé poténsia iha área ka pertense ba “Zona Wallace” no iha ekosistema rai-maran, tasi no debu/lagos ho kualidade ne’ebé di’ak liuliu iha setór ekonómiku.

Iha Kódigu Penál, artigu 215, 217 to’o 221, ko’alia kona-ba sunu rai, tesi ai, halo kontaminasaun ba ár, bee e rai, poluisaun sonoru (ruídu) uza bomba ka materiál kímiku hodi estraga no kaer ikan no peska ikan ilegál konsidera krime no ema estraga rekursu biodiversidade, sei hetan sansaun hanesan tama kadeia tinan 3 to’o 5 no hetan multa ho valór osan $5.000 bazeia Regulamentu UNTAET No.19/2000 no Dekretu Lei.

Dekretu lei ne’e, Konsellu Ministru aprova iha 8 maiu 2019 ho hakarak salvaguarda ba biodiversidade iha Timor-Leste, ne’ebé pozisiona iha rejiaun ida ho biodiversidade boot iha mundu no ne’ebé iha númeru boot hosi ai-horis no animál sira ne’ebé diferente.

Dekretu Lei define kuadru jurídiku protesaun nian no konservasaun ba biodiversidade, komplementa dispostu iha Sistema Nasionál hosi Área Protejida sira, no implementa lei hosi baze sira ambiente nian hodi hala’o protesaun ho konservasaun hosi espésie, habitat ho ekosistema sira.

Iha parte institusionál sira, dekretu lei hakarak promove mós integrasaun hosi konsiderasaun sira kona-ba biodiversidade sira iha polítika setoriál oioin no husu partisipasaun ativa hosi sosiedade iha protesaun ba biodiversidade.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here