Sesaun plenária Parlamentu Nasionál. Imajen/Tatoli

DILI, 14 outubru 2019 (TATOLI) – Parlamentu Nasionál (PN) liuhosi sesaun plenária segunda ne’e, aprova ona rezolusaun hodi konstitui Grupu Joven Parlamentár.

Nune’e, Projetu Rezolusaun PN númeru 40/V/2-Konstituisaun Grupu Joven Parlamentár, pasa ho votu a-favór 44, kontra 0 no abstensaun 1.

Deputada Partidu Demokrátiku (PD), Elvina Sousa, konsidera Grupu Joven ne’e sei hametin no haforsa liután papél joven iha polítika tanba joven sira hanesan futuru ba nasaun.

“Bainhira Joven parlamentár metin, signifika sei hametin liután demokrasia. Ita hatene katak númeru joven aas tebes maibé maibé ninia reprezentasaun iha Parlamentu Nasionál menus. Ho kriasaun grupu ida ne’e bele hasa’e númeru reprezentasaun hosi joven”, dehan Deputada Bankada Opozisaun ne’e liuhosi plenária, segunda ne’e.

Nia haree durante ne’e joven potensiál barak maka la hola parte iha vida polítika, entaun ho kriasaun grupu ne’e bele ekonraja joven sai polítiku ne’ebé di’ak iha futuru.

Enkuantu, Deputada Bankada FRETILIN, Josefa Pereira, hateten projetu rezolusaun ne’e importante tanba iha Angola aprova tiha ona estatutu hanesan organizmu parlamentár, ne’ebé hanesan mós Rede Feto Parlamentár, Rede Joven Parlamentár iha Asembleia Parlamentár ba komunidade ho lian portugés (AP-CPLP) nian.

“Iha nesesidade ita atu konstitui duni grupu ida ne’e, maibé ha’u tau iha kestaun ida para sai klaru liután iha ne’e tanba bele integra deputada no deputadu hotu ne’ebé idade 45 maibé ninia mandatu tinan 5 ona”, nia akresenta.

Parte seluk, Deputadu Bankada CNRT, Adérito Hugo da Costa, esplika inisiativa kriasaun grupu ne’e di’ak tebes nune’e bele formaliza tiha Timor-Leste ninia partisipasaun iha fórum internasionál sira, liliu iha AP-CPLP nian.

“Tanba eventu AP-CPLP ne’e ejize joven parlamentár atu prienxe organizasaun sira iha CPLP nia laran. Númeru 3 iha projetu rezolusaun sei define no regula enkuantu iha estatutu mak ita sei regula hanesan ezemplu tinan oin nia la’ós tinan 45 ona”, esplika Deputadu Adérito Hugo da Costa.

Prezidente Parlamentu Nasionál, Arão Noé de Jesus da Costa Amaral, hateten estatutu mak sei regulariza bainhira konstitui grupu ne’e iha tinan 45 ba kraik, hafoin mandatu tinan aumenta.

Jornalista : Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here