Ministru Negósiu Estranjeiru no Kooperasaun, Dionísio da Costa Babo Soares. Imajen/TATOLI

DILI, 14 outubru 2019 (TATOLI) – Ministru Negósiu Estranjeiru no Kooperasaun, Dionísio da Costa Babo Soares, iha segunda ne’e konsulta lista kandidatu Embaixadór Timor-Leste (TL) ba rai-liur ho Primeiru-Ministru (PM), Taur Matan Ruak, hodi bele aprezenta iha reuniaun ezekutivu semana-ne’e.

“Kona-ba lista Embaixadór sira, ha’u konsulta ona ba Primeiru-Ministru no bain-rua (kuarta) ha’u sei hato’o ba Konsellu Ministru. Aprova ona karik, Primeiru-Ministru bainhira ba hasoru Prezidente Repúblika maka sei aprezenta lista ne’e”, tenik Dionísio ba jornalista sira iha Palásiu Governu.

Notísia Relevante: PR Bolu Ministru Dionísio Hodi Ko’alia Kona-ba Lista Embaixadór Pendente

Governante ne’e haktuir, momentu ne’ebá Prezidente Repúblika (PR), Francisco Guterres ‘Lú Olo’ husu atu halo ajustamentu ba naran balun.

“Ha’u hanoin ne’e la’ós kestaun tanba Governu maka hili no Estadu aprova. Tanba ne’e laiha kestaun no ita halo de’it ajustamentu. Ita husu kompreensaun ba maluk sira-ne’ebé naran iha maibé agora naran laiha, tenke kompreende tanba agora Estadu tenke halo desizaun”, nia akresenta.

Biban ne’e, nia rejeita opiniaun públiku ne’ebé dehan lista embaixadór pendente mai husi partidu ne’ebé kaer-ukun.

“Governu hili tanba Governu haree ema-ida ninia kompeténsia, tanba ne’e laiha polítika iha ne’e. Ita tau naran aprova, prontu. Bainhira Xefe Estadu aprova ona, tenke lori ba nasaun sira ne’ebé atu simu. Sei nasaun sira-ne’e simu maka ita bele haruka embaixadór sira ba nasaun ne’e maibé selae ita tenke hili foun, prosesu ne’e la’ós fásil”, nia subliña.

Nia hatutan: “Ha’u hanesan Ministru Negósiu Estranjeiru, ha’u iha responsabilidade morál atu hili ema-ne’ebé maka ha’u sente bele reprezenta nasaun ne’e. Sei ba maka ladi’ak bele haruka filafali, ne’e laiha problema.

Antes ne’e, lista kandidatu embaixadór sira ne’ebé Governu haruka ba PR mak hanesan:

  1. Inês Maria de Almeida, Embaixadora TL ba Camberra, Austrália
  2. Gil da Costa, Embaixadór TL ba Reinu Unidu Gra Británia no Irlanda Norte
  3. José Luís Guterres, embaixadór TL ba Konfederasaun Suiça
  4. Paulo Assis Belo, embaixadór TL ba Repúblika Moçambique
  5. Lisualdo Menezes Coimbra Gaspar, embaixadór TL ba Wellingtong, Nova Zelándia
  6. Isílio António de Fátima Coelho da Silva, embaixadór TL ba Washington DC, EUA
  7. Isabel Amaral Guterres, embaixadora TL ba Lisboa, Portugal
  8. Isabel Amaral Guterres, reprezentante permanente TL ba sekretariadu ezekutivu ba komunidade nasaun ho lian portugés (CPLP)
  9. Isabel Amaral Guterres, embaixadora la rezidente TL ba Repúblika Cabo Verde.
  10. Olímpio Maria Alves Gomes Miranda Branco, embaixadór TL ba Repúblika Brazíl
  11. Maria Natália Guterres Viegas Carrascalão, embaixadora ba Singapura
  12. Ilídio Ximenes da Costa, embaixadór TL ba Japaun
  13. Hermenegildo Lopez, embaixadór TL ba Kambódia
  14. Abrão dos Santos, embaixadór TL ba Repúblika Populár Xina
  15. Joanna Veneranda Amaral, embaixadora TL ba Santa Sé
  16. Armandina Maria Gusmão dos Santos, embaixadora TL ba Reinu Tailándia.

Hosi lista ne’e, na’in-tolu mak simu ona pose no dezloka ona ba nasaun ne’ebé atu ba, no restante sei pendente.

Entretantu iha loron 13 agostu, Xefe Estadu fó pose ona ba Embaixadór Timor-Leste na’in-tolu hanesan Olímpio Branco nu’udar Embaixadór ba Brazíl, hodi troka Embaixadór Gregório de Sousa, Isílio Coelho nu’udar Embaixadór ba Estadu Unidu Amérika (EUA), hodi troka Embaixadór Domingos Sarmento Alves no Lisualdo Gaspar nu’udar Embaixadór ba Nova Zelándia hodi troka Embaixadór Cristiano da Costa.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here