Ministru Negósius Estranjeirus no Kooperasaun, Dionísio da Costa Babo Soares. Imajen/Antonio Goncalves

DILI, 14 outubru 2019 (TATOLI) – Iha fulan kotuk, Timor-Leste hetan konvite hosi Organizasaun Nasaun Unida (ONU) hodi partisipa iha Asembleia Jerál ONU iha Nova Iorke, iha ne’ebé reprezenta hosi Ministru Negósiu Estranjeiru no Kooperasaun, Dionísio Babo Soares.

Tanba ne’e, segunda ne’e, Dionísio Babo marka prezensa iha Paláçio do Governo hodi atualiza rezultadu soru-mutuk altu nível ne’e ba Primeiru-Ministru, Taur Matan Ruak.

“Ha’u mai atualiza rezultadu reuniaun durante Asembleia Jerál ONU ba dala-74 nian. Iha ne’ebá, pontu lubuk ida mak ko’alia. Ida kona-ba kestaun mudansa klimátika. Ida seluk mak dezenvolvimentu sustentável no mós kona-ba nasaun meiu dezenvolvidu. Ida fali tan asuntu jéneru nian ho mós atividade sira seluk ne’ebé iha relasaun ho dezenvolvimentu ekonomia,” Dionísio haktuir.

Nia subliña, intervensaun Timor-Leste nian iha Asembleia Jerál refere foka liubá mudansa klimátika nian.

“Ita mós halo intervensaun ida kona-ba oinsá mak nasaun boot sira liliu sira-ne’ebé iha relasaun emisaun karbonu ka poluisaun ne’e bele involve maka’as liu ajuda nasaun sira-ne’ebé ki’ikoan tanba problema ida-ne’ebé mosu iha parte Ázia Pasífiku ne’e maka kestaun tasi sa’e aas ba beibeik. Segundu mak mudansa udan ne’e fó impaktu tebes ba ita-nia agrikultór sira liliu ba ita-nia sistema agríkola jerál,” Dionísio esplika.

Nia dehan, iha reuniaun boot ne’e, Timor-Leste hanesan nasaun ki’ikoan tenke la’o hamutuk ho nasaun ki’ikoan seluk iha mundu tenta atu husu apoiu maka’as hosi nasaun boot sira nune’e nasaun ki’ik sira bele sobrevive iha tempu naruk.

“Kestaun seluk iha Asembleia Jerál ne’e ita mós ko’alia kona-ba oinsá Timor-Leste bele ka nia pozisaun hodi haree ba kestaun sira bolu fundu ba dezenvolvimentu. Halo ida-ne’e para oinsá finanseiru hosi Governu nian ka hosi ajudu internasionál nian no mekanizmu saida mak nasaun sira adopta atu bele garante katak laiha ema ida mak ita husik hela ba kotuk,” nia hatutan.

Aleinde ne’e, governante ne’e aprezenta mós nia vizita ba Cuba tanba nasaun refere hanesan Timor-Leste nia nasaun aliadu tanba durante Timor-Leste independénsia nasaun ne’e hanesan nasaun daruak ne’ebé fó kedas apoiu rekoñesimentu.

Tuir dadus ne’ebé iha, hahú hosi Timor-Leste independénsia to’o ohin loron, Cuba fó oportunidade ba timoroan besik ona rihun resin mak aprende iha ne’ebá iha área oioin hanesan médiku, siénsia matemátika no seluk-tan.

Entretantu, timoroan ne’ebé sei aprende hela iha ne’ebá hamutuk 60 no 27 mak hasai hela kursu kona-ba médiku espesialista. Enkuantu, balun eskola hanesan médiku baibain, matemátika no seluk-tan.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here