Vise Ministru Administrasaun Estatál, Abílio José Caetano. Imajen/TATOLI

DILI, 14 outubru 2019 (TATOLI) – Iha segunda ne’e, Ministru Administrasaun Estatal (MAE) Interinu, José Abílio Caetano hamutuk ho nia ekipa hala’o soru-mutuk ho Primeiru-Ministru, Taur Matan Ruak hodi diskute asuntu importante rua kona-ba prosesu Dezenvolvimentu Suku (PNDS) no dezastre naturál ne’ebé akontese iha loron hirak liubá.

“Ohin ami mai hasoru malu ho Primeiru-Ministru tanba hetan konvokasaun. Laiha buat seluk ami ko’alia. Só buat rua de’it mak ami ko’alia. Dahuluk, simu orientasaun atu simu orsamentu jerál Estadu 2020 ho orsamentu hosi PNDS ne’ebé ezekuta ona dezde 2019 ne’e. Daruak, ko’alia barak liu oinsá atu tau atensaun ba ita-nia maluk sira ne’ebé foin lalais sai vítima ba dezastre naturál,” tenik José iha Palácio do Governo.

Nia dehan, sira ko’alia kona-ba dezastre naturál ne’ebé foin lalais akontese iha munisípiu haat hanesan Aileu, Ermera, Liquiçá no Bobonaro.

“Iha kuarta liubá, Primeiru-Ministru fó ona orientasaun atu ami halo reuniaun ho ministériu relevante hanesan Ministériu Solidariedade Sosiál no Inkluzaun, Ministériu Interiór, Sekretáriu Estadu Protesaun Sivíl no Administradór na’in haat. Entaun, ami simu kedas relatóriu hosi munisípiu haat ne’e entaun konsege ajuda ona parte balun,” José haktuir.

Nia hatutan, iha munisipiu haat ne’e, Bobonaro anin sobu uma nia kakuluk hamutuk ho igreja ida no eskola. Liquiçá kahur malu. Balun ahi han uma no balun anin sobu kakuluk. Ermera uma-kain hamutuk 296 no totál hosi númeru uma hosi uma-kain ne’e balun ahi han, balun anin sobu no kintal kafé hamutuk ektare 100 hetan estraga. Enkuantu, Aileu uma hamutuk 36 no númeru ne’e barak liu anin sobu no uitoan ahi han.

“Ho buat sira ne’e hotu mak Primeiru-Ministru bolu ami mai. Nune’e, kuarta agora ne’e ami bele aprezenta buat ruma iha Konsellu Ministru hodi foti asaun ba ida-ne’e,” nia subliña.

Aleinde ne’e, parte PNDS mós aprezenta relatóriu serbisu 2019 ba Primeiru-Ministru. Tuir dadus ne’ebé iha 2019 ne’e sira konsege hala’o ona dezenvolvimentu iha suku 202.

“Programa ne’ebé PNDS halo ona iha suku 202 ne’e maioria iha área bee-moos no estrada, irigasaun ki’ik sira no manutensaun edifísiu sira hanesan sede suku. Planu 2020 nian ita hakarak tau iha suku hotu-hotu maibé buat hotu depende ba aprovasaun hosi Parlamentu Nasionál,” dehan Governante ne’e.

Entretantu, totál orsamentu ne’ebé PNDS gasta iha 2019 ba suku 202 ne’e hamutuk millaun $9 resin.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here