Koordenadór Gabinete Apoiu Sosiedade Sivíl, Filipe da Costa. Imajen Tatoli/Egas Cristóvão

DILI, 14 outubru 2019 (TATOLI) – Koordenadór Gabinete Apoiu Sosiedade Sivíl, Filipe da Costa, segunda ne’e, hasoru malu ho Primeiru-Ministru (PM), Taur Matan Ruak hodi relata progresu serbisu durante ne’e.

“Ohin ha’u mai relata serbisu uitoan ne’ebé durante ne’e Gabinete Apoiu Sosiedade Sivíl (GASS) hala’o liliu ami-nia implementasaun programa sira ami hala’o iha 2019 nian barak la’o di’ak hanesan implementasaun Igreja balun ne’ebé hetan ona aprovasaun hosi Governu dahuluk entaun ita kontinua de’it. Ezemplu, konstrusaun Igreja Ai-mutin, Igreja Becora no eskola Fatumeta,” tenik Filipe iha Paláçio do Governo.

Nia dehan, konstrusaun ba Igreja rua no eskola ida-ne’e la’o neineik liu maibé finanseiru aloka ona.

“Kona-ba prosesu konstrusaun la’o neineik ne’e só kompañia sira mak bele esplika. Maibé, ami-nia hakarak lais liu di’ak liu. Osan ne’ebé ita aloka ba konstrusaun Igreja Ai-mutin hamutuk mil $300 resin, Igreja Becora nian mill $300 no eskola Fatumeta nian mak besik mil $400,” nia haktuir.

Tanba ne’e,  nia informa, Primeiru-Ministru husu konstrusaun sira hanesan ne’e tenke sai modelu ne’ebé di’ak iha sosiedade.

“Primeiru-Ministru husu ami atu mantein fiskaliza para bele ajuda implementasaun projetu sira-ne’e ho di’ak. Konstrusaun Igreja ne’e tenke halo to’o ramata,” nia subliña.

Enkuantu, orsamentu jerál Estadu (OJE) 2019 aloka ba Gabitente Apoiu Sosiedade Sivíl hamutuk millaun $5.9.

Entretantu, Filipe haklaken, tuir kontratu ne’ebé iha,  Igreja rua ne’e no eskola refere tenki finaliza iha tinan oin (2020).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here