Deputadu Partidu Demokrátiku (PD), Adriano do Nascimento. Imajen TATOLI/António Goncalves

DILI, 14 outubru 2019 (TATOLI) – Komisaun A ne’ebé trata asuntu Justisa no Konstituisaun sei kontinua diskute Lei Antí-Korrupsaun iha fulan-abríl 2020.

Membru Komisaun A, Adriano do Nascimento, preukupa ho tempu atu halo diskusaun ba Projetu LAK.

“Ha’u-nia hakarak lei-ne’e debate hotu ona iha lejizlatura ida-ne’e, maibé ha’u iha preukupasaun tanba Komisaun A hola ona desizaun katak lei-ne’e sei deskute fali fulan-neen, hahú hosi fulan-outubru signifika abríl 2020 foin maka foin deskuti fali”, dehan Deputadu Adriano do Nascimento ba jornalista sira iha Parlamentu Nasionál (PN), segunda ne’e.

Notísia Relevante: PN Aprova Testu Substitutivu Projetu Lei Anti-Korrupsaun Iha Jeneralidade Ho Unanimidade

Nune’e, Deputadu Bankada PD ne’e espera Komisaun bele finaliza LAK iha tempu ne’ebé determina ona.

“Hahú outubru agora, liu tiha fulan-neen mak foin deskuti tanba sá? Ida dehan Orsamentu 2020 atu tama ona hahú fókus hosi outubru, novembru no dezembru. Razaun seluk janeiru, fevereiru, no marsu tékniku sira halo fali elaborasaun no halo armonizasaun vizita Macau-nian. Ami rona katak abríl ka maiu hanesan mak deskuti fali”, hateten Deputadu Opozisaun ne’e.

Parte seluk, Prezidente Komisaun A ne’ebé trata asuntu Justisa no Konstitusionál, Carmelita Caetano Moniz, rekoñese diskusaun LAK ne’e adia tanba oras ne’e foka ba diskusaun Orsamentu 2020.

Notísia Relevante: Komisaun A Hakarak Tetu Implementa Deklarasaun Riku-Soin iha LAK

“Ami adia hafoin orsamentu maka kontinua fali. Ami sei prepara despozisaun kapítulu ida kona-ba deklarasaun riku-soin nian. Ida-ne’e presiza tempu tebes tanba deklarasaun riku-soin la’ós artigu ida ka rua de’it, maibé kuaze artigu 20 ka 30 entaun presiza tempu atu haree”, Deputada Bankada CNRT ne’e argumenta.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here