Ikan Saboko iha Atabe,Imajen/Antonio Goncalves

ATABAE, 14 outubru 2019 (TATOLI)-Timor-oan sira, liu-liu hirak ne’ebé hela iha tasi ibun toman tiha ona ikan saboko. Ita hotu gosta no kaan duni ikan saboko nia sabór.

Notísia Relevante : Masin Atabae Fó Moris ba Familia Uma Kain 76

Ikan Saboko iha Atabe. Imajen/Antóno Gonçalves

Ba Timor, liuliu hirak iha tasi ibun hanesan iha Laivai, Lautem nian, Seiçal, Mulia, Baucau nian, Caravela, Vemasse-Baucau, Manatuto nian no tesik to’o ba Maubara, Liquiça to’o tasi ibun Atabae-Bobonaro nian, ikan saboko sai ona hahán favoritu no gostu tebes.

Tesik ho transporte ba fatin hirak tasi ibun. Bainhira hetan ikan saboko tara tuir estrada ninin hanoin kedas ona saida de’it mak falun metin iha tali-tahan ou akadiru-tahan  nia laran ne’e. La seluk-la leet, ikan pedasuk balun, kahur ho sukaer dikin uitoan, ai-manas uitoan no kari liu masin uitoan  tunu to’o tasak didi’ak  no nia morin ho gostu halo ita tolan kaben.

Ikan saboko nia sabór entre munisípiu ida ho munisípiu seluk la hanesan. Maibé iha Aldeia Tutubae, Suku Aidabalete, Postu Administrativu Atabae, Munisípiu Bobonaro, ikan saboko nia sabór halo atrai tebes ita ahu han no han bei-beik.

Husi kriatividade no badaen Bernadete Freitas ho  Marcina Moniz sira nian, tempra ikan saboko sai gostu tebes. Tanba ne’e, la duvida, bainhira ema husi Bobonaro atu mai Dili no husi Dili atu ba Bobonaro sempre hakmaan sira nia viajen ho ikan saboko. To’o balun sosa lori mai Dili hanesan lembransa ba família sira iha Dili.

Bernadete Freitas ho  Marcina Moniz ho nia feto maluk sira seluk hahú okupa estrada ibun Aldeia Tutubae nian iha tinan 2016. Sira sosa ikan fresku husi peskadór sira no sira prosesa sai ikan saboko ne’ebé ‘natural’ tebes no gostu duni.

Atividade negósiu simples, maibé fó rahun di’ak, tanba  husi fa’an ikan saboko ne’e, sira bele ajuda ekonomia uma laran no apoiu selu oan sira nia eskola.

Loron ida, negosiante ikan saboko ne’e la hetan rendimentu boot. Kada ema talvés $10,00 de’it. Maibé ba sira iha foho ne’e sufisiente ona, tanba to’o fulan ida sira bele hetan rendimentu $200,00.

“Ami sira moris iha foho ne’e, $200,00 valor boot tebes para sosa foos, ami nia presiza no oan sira nia presiza,” hateten Bernadete Freitas ho  Marcina Moniz, bainhira dada lia ho Ajénsia TATOLI iha sira nia baraka fa’an ikan saboko, foin lalais ne’e.

Atividade fa’an ikan saboko ne’e la’ós Bernadete Freitas ho  Marcina Moniz mesak halo, maibé iha mós ninia feto-maluk no mane-maluk hamutuk uma kain 30 mak fa’an ikan saboko.

Uitoan ka barak, sira kontente  moris hanesan ema fa’an ikan saboko tanba bele ajuda ona sira.  Sira nunka tane liman, halerik no husu ajuda ba Governu. Sira moris rasik buka hahán husi sira nia liman fuan 10.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here