Sesaun plenária Parlamentu Nasionál. Imajen dok. Tatoli

DILI, 14 outubru 2019 (TATOLI) – Partidu Congresso Nacional Reconstrução de Timor (CNRT), husu VIII Governu Konstitusionál ne’ebé lidera husi Primeiru-Ministru, Taur Matan Ruak, atu foti desizaun hodi nomeia ema foun lidera Rejiaun Administrativa Espesiál Oé-Cusse Ambeno (RAEOA).

Agora dadauk, Arsénio Paixão Bano asume kargu nu’udar Prezidente RAEOA interinu durante loron 120 tuir estatutu RAEOA artigu 20, hahú husi 1 agostu 2019.

Notísia Relevante: Arsénio Bano Asume Kna’ar Nu’udar Prezidente RAEOA Interinu Durante Loron 120

Deputada Bankada CNRT, Virgínia Ana Belo, hateten lei haktuir klaru ona maibé to’o oras ne’e seidauk iha desizaun hosi Governu.

“Problema ne’e iha ne’ebé, to’o oras ne’e Governu seidauk foti desizaun”, Deputada Bankada Governu ne’e eziji liuhosi plenária segunda ne’e.

Hatan ba preukupasaun ne’e, Sekretáriu Estadu Komunikasaun Sosiál, Merício Juvenal dos Reis ‘Akara’, informa prosesu sei la’o no sei iha desizaun iha tempu badak.

“Iha tempu badak Konsellu Ministru sei foti desizaun”, dehan Akara.

Entretantu, konta to’o ohin loron, Arsénio Paixão Bano asume ona knaar durante loron 75 ona, tanba ne’e falta loron 45 para kompleta ninia mandatu lidera RAEOA.

Molok asume kargu nu’udar Prezidente interinu, Arsénio hanesan Sekretáriu Rejionál Edukasaun, Sosiál no Asuntu Edukasaun.

Antes ne’e, zona spesiál merkadu ne’e lidera husi Marí Alkatiri, ne’ebé simu pose hanesan Prezidente RAEOA no Zona Espesiál Ekonomia Sosiál Merkadu  (ZEESM) iha 14 jullu 2014 no mandatu ramata iha 30 jullu 2019.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here