Prezidente Autoridade Avisaun Civil Timor- Leste, Ana Rosália Ximenes Varela. Imajen/Natalino da Costa.

DILI, 14 outubru 2019 (TATOLI) – Prezidente Autoridade Aviasaun Sivíl Timor-Leste (AACTL, sigla portugés), Ana Rosália Ximenes Varela, informa iha 2020, Aviasaun Sivíl Timor-Leste sei hetan auditoria husi International Civil Aviation Organization (ICAO).

Objetivu husi auditoria ne’e atu ICAO bele hatene progresu no dezenvolvimentu AACTL nian to’o iha ne’ebé ona, atu nune’e saida maka sei falta Timor-Leste esforsu hodi bele kompleta.

“Tanba ita membru ona husi ICAO dezde 2003 iha Kanadá, agora oinsá ita prepara aan atu simu audit husi ICAO iha tinan 2020 no ami preparadu atu simu audit, nune’e saida maka falta ka aumenta tan saida iha Aviasaun Sivíl Timor-Leste ba oin”, dehan Prezidente AACTL ba Ajénsia Tatoli iha Kaikoli, ohin.

Dirijente másimu AACTL ne’e fundamenta katak auditoria ne’e rasik importante atu nune’e bele hatene kondisaun Aviasaun Sivíl Timor-Leste nian.

“Durante ne’e ita sei menus buat barak, ida ne’e husi ICAO nian ezijénsia tanba ne’e auditoria 2020 hosi ICAO maka ita sei hatene saida maka ita presiza kompleta”, rekoñese.

Maibé, husi AACTL husu ona ba organizasaun mundiál ne’e atu oferese sira-nia ekipa téknika sira ba AACTL atubele halo akompañamentu serbisu ba Aviasaun Timor-Leste, nune’e iha 2020, iha auditoria husi ICAO, nu’udar nasaun membru bele prepara di’ak liután.

Enkuantu, AACTL iha ona estrutura autonomia ne’ebé halo serbisu maski sei provizória, tanba ne’e ICAO nia ezijénsia oinsá bele halo permanentemente, maibé ba buat seluk, depois ICAO halo auditoria iha 2020 maka foin haree.

Notísia relevante : ICAO Husu TL Prienxe Rekizitu Estrutura Autonomia Unidade Aviasaun Sivíl

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here