Prezidente LFA, Nilton Gusmão (liman karuk), entrega Tasa 12 Novembru ba Sekretáriu Estadu Juventude no Desportu, Nélio Isaac Sarmento, iha final Tasa 12 Novembru, sábadu ohin. Imajen Mídia LFA

DILI, 12 outubru 2019 (TATOLI)—Prezidente Liga Futeból Amadora (LFA), Nilton Gusmão haksolok ho finál Tasa 12 Novembru ne’ebé la’o ho ámbitu anima tebes adeptu no ema hotu ne’ebé hadomi futeból.

Tanba ne’e, nia husu ba jogadór sira hotu atu mantein disiplina iha treinu no jogu nune’e bele hatudu jogu ne’ebé bonitu iha kampu laran.

“Jogu ohin la’o kapa’as tebes. Jogu ne’e la’o tensaun uituan halo adeptu sira mós animadu. Ida-ne’e mak diverte ita-nia sosiedade no fó mós oportunidade ba ita-nia joven sira atu prátika desportu. Ha’u enkoraja nafatin ita-nia jogadór sira atu mantein disiplina iha treinu nune’e bele halo jogu iha ita-nia rain sai furak liután,” tenik Nilton iha Estádiu Munisipál Dili, ohin, hafoin asiste finál Tasa 12 Novembru.

Nia dehan, Tasa 12 Novembru ba époka ida ne’e (2019) diferente uituan ho tinan sira liu ona. “Iha époka ida ne’e, ita halo Tasa 12 Novembru nian hamutuk hotu ho Liga. Entaun, jogu sira-ne’e ramata tutuir malu de’it. Kona-ba Super Tasa ita sei hala’o iha Estádiu Gleno,” Nilton esklarese.

Tanba ne’e, nia konvida adeptu futeból sira hotu atu partisipa másimu iha jogu finál entre SLB ho Lalenok. “Husu mós ba Ermera oan sira atu partisipa di’ak iha jogu ikus ne’e,” nia haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here