Parlamentu Joven hala'o enkontru ho Prezidente Komisaun C, Fernanda Lay no Sekretária Meza Parlamentu Nasionál, Terezinha Maria Maria Viegas, iha sala Konferénsia, sesta (11/10). Imajen/Evaristo Soares Martins

DILI, 11 outubru 2019 (TATOLI) – Parlamentu Nasionál (PN), realiza edisaun dahuluk kona-ba atividade Parlamentu Joven, liliu ba estudante sekundária públiku no privada iha kapitál Dili, ho objetivu estudante sira bele koñese di’ak liu servisu husi órgaun lejizladór nian.

Sekretária Jerál Parlamentu Nasionál, Cedelizia Faria dos Santos, esplika atividade Parlamentu Joven ne’e hanesan edisaun dahuluk no ninia alvu ba estudante sekundária no foka iha munisípiu Dili de’it.

Nia dehan, iha atividade ne’e estudante na’in-30 mak partisipa maibé ohin loron eskola balun sei tuir hela ezame entaun sesaun ida ohin partisipa de’it estudante na’in-20.

“Ninia objetivu maka atu hodi juventude sira koñese di’ak liu tán servisu Parlamentu nian ho tópiku temátiku protesaun meiu ambiente. Espera tópiku ne’e bele hamosu ideia foun ne’ebé kreativu hosi joven sira”, tenik Cedelizia Fariaba jornalista sira, sesta ne’e.

Tuir Sekretária Jerál, programa ne’e realiza bazeia ba planu estratéjiku PN nian no hili temátika meiu ambiente tanba Timor-Leste enfrenta lixu barak no iha foho ema sunu-rai arbiru.

“Kazu sira ne’e afeta ba moris populasaun nian, entaun ami hanoin katak tema ida ne’e mak relevante ba situasaun atuál”, nia akresenta.

Tuir nia, programa ne’e hanesan pilotu no ba-oin sei haree eskola sira seluk iha territóriu nasionál.

Iha fatin hanesan, Reprezentante Parlamentu Joven hodi Eskola Externato de São José, Prianca Dias Ximenes, hateten atu proteje lixu iha Timor-Leste tenke implementa polítika zero plástiku nune’e bele uza fali bote.

“Ami iha rekomendasaun tolu, Governu kria patrulla lixu, kontrola lixu no kria instituisaun hodi halo sosializasaun, no ikus liu bainhira ita atu diminui lixu tenke uza bote hodi troka fali plástiku nune’e ita promove ita-nia patrimóniu kulturál”, tenik estudante ne’e iha PN.

Realizasaun edisaun dahuluk Parlamentu Joven ne’e, fasilita hosi Prezidente Komisaun C, Fernanda Lay, Sekretária Meza Parlamentu Nasionál, Terezinha Maria Viegas no Deputada Bankada FRETILIN, Josefa Soares.

Estudante hosi Ensinu Sekundária hamutuk 10 mak partisipa iha atividade ne’e, maibé Eskola São Miguel no 12 Dezembru mak la partisipa tanba iha prosesu ezame.

Estudante ne’ebé partisipa mai hosi Canossa, São Pedro, Colégio Paulo VI, Escola Hospitalidade Turismu (EHT), STM Becora, Cristal, 12 Novembru no eskola balun tan.

Estudante sira debate kona-ba projetu rekomendasaun protesaun ba meiu ambiente no pergunta liuhosi plenária.

Programa seluk mak estudante sira hala’o maka eleisaun hodi hili meza ne’ebé kompostu husi Prezidente Parlamentu Joven, Vise-Prezidente no Sekretária, hodi hala’o diskusaun no aprovasaun projetu rekomendasaun sira.

Nune’e, programa ikus liu mak distribui sertifikadu ba deputadu joven (estudante sira) no fahe sertifikadu ba responsável profesór sira.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here