Prezidente Liga Futeból Amadora (LFA), Nilton Gusmão. Imajen dok. TATOLI

DILI, 12 outubru 2019 (TATOLI)—Prezidente Liga Futeból Amadora (LFA), Nilton Gusmão rekoñese jogu LFA époka 2019 la’o iha situasaun ekonómika rai laran ne’ebé la’o ladún di’ak.

“Époka ida-ne’e ha’u rekoñese katak la’ós époka ida ne’ebé fásil. Époka ida difísil liu tanba ita-nia situasaun ekonómika rai laran difísil tebes. Nune’e mak ema sira ne’ebé investe iha futeból buka trava uituan hodi implika ba ita-nia atividade sira,” dehan Nilton iha Estádiu Munisipál Dili, sábadu ne’e.

Nia hatutan, maski ekonómika susar maibé la konsege hamate ema hotu nia vontade atu dezenvolve futeból iha nasaun ne’e.

“Klube sira ho sira-nia kompromisu atu halo jogu to’o époka ne’e ramata. Ita mós agradese ba apoiu Governu nian ne’ebé tulun ona Liga ne’e la’o to’o ona époka dahaat,” nia haktuir.

Tanba ne’e, hanesan responsável másimu ba LFA, Nilton husu ba Governu kontinua tau importantánsia ba Liga ne’ebé la’o hela.

“Tuir ami rona Governu dehan atividade ida-ne’e la’ós prioridade ona. Tanba ne’e mak ami-nia subvensaun ba atividade ida-ne’e buka atu ko’a hotu. Ha’u hanoin, ida-ne’e ita la ajuda. Ita hahú tiha atividade ida-ne’e tinan lima ona mak dehan fali la prioridade entaun ita-nia kompromisu polítiku sira la ajuda ona ita-nia joven sira dezenvolve sira-nia talentu,” nia subliña.

Ho haraik-aan, Prezidente LFA husu ba Governu no setór privadu sira bele tau nafatin prioridade hodi tulun Liga ne’e la’o di’ak liután ba oin.

Tuir nia, atividade ne’e mak lori joven sira hamutuk hasa’e kapasidade desportivu. Atividade ne’e mós mak lori komunidade konsentra hamutuk iha estádiu.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here