Jornalista 31 simu sertifikadu hafoin partisipa treinamentu Jornalizmu : Salva Ambiente.

DILI, 11 outubru 2019 (TATOLI) – Sekretáriu Estadu Ambiente (SEA) no Konsellu Impresa (KI) fó sertifikadu ba jornalista 31 ne’ebé durante loron haat tuir semináriu Jornalizmu : Salva Ambiente.

Semináriu durante loron haat ne’e liuhosi apoia finanseiru husi Programa Nasaun Unida ba Dezenvolvimentu (PNUD)-Global Enviroment Facility (GEF).

“Liuhusi formasaun loron haat ne’e ami fiar katak konta ho ita boot apoiu liuhosi publikasaun notísia sira atu ita-nia populasaun bele hadomi ambiente”, Diretór Nasionál Sekretáriu Estadu Ambiente, Nelson Madeira, ne’ebé reprezenta SEA afirma hafoin ensera semináriu Jornalizmu : Salva Ambiente iha Otél Turizmu, sesta ne’e.

Nelson Madeira agradese ba KI no PNUD ne’ebé oferese ona treinamentu ne’e ba jornalista sira tanba bele apoia SEA hodi halo sesibilizasaun ba abitante sira hadomi ambiente.

“Ha’u espera treinamentu ne’e bele hasa’e kapasidade jorrnalista no mídia sira atu haluan tan kobertura ba asuntu ambiente, tanba ambiente saudavel mak ita ema mós saudavel”, nia espera.

Reprezenta Prezidente Konsellu Imprensa, Konselleiru José Ximenes, dehan formasaun ne’e atu hasa’e koñesimentu jornalista sira atubele hala’o kobertura asuntu ambiente.

“Ita espera katak liuhosi treinamentu imi (jornalista) sira hahú kobre no fó importánsia ba ambiente hodi sidadaun hotu hadomi ambiente”, katak.

Jornalista Rádio Klibur, Febiana M. X, agradese ba SEA, KI no PNUD tanba treinamentu ne’e hasa’e koñesimentu ba importánsia ambiente ba ema nia moris.

“Tanba liuhosi formasaun ne’e ha’u bele halo kobertura maka’as liu iha ambiente tanba liga direita ba ema nia moris”, nia garante.

Jornalista husi Jornál INDEPENDENTE, Jacinto Xavier agradese mós ba SEA, KI no PNUD tanba liuhosi formasaun ne’e bele hasa’e nia abilidade no koñesimentu ba importansia ambiente ba ema nia moris.

“Ami sei hamutuk kria grupu jornalista no kada redasaun ida-idak atu fó imporansia ba ambiente, tanba ambienta saudavel mak ita ema mós saudavel”, haktuir.

Semináriu ne’e hahú iha loron 8 to’o 11 outubru, ho matéria sira oinsá jornalista sira bele hakarek notisia no públika hodi muda konxiénsia sidadaun sira atu hadomi ambiente. Jornalista 31 ne’e husi mídia online, radiodifuzaun, imprime no estudante Departementu Komunikasaun Sosial, UNTL.

Nótísia relevante : Papél Jornalista Importante “Salva Ambiente”

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here