Lia-na'in sira simu Prezidente Repúblika, Francisco Guterres Lú Olo ho espoza ho lia dadolin, molok hakat tama ba Jináziu Lospalos hodi halo diálogu. Imajen TATOLI/Cipriano Colo

LAUTÉM, 11 outubru 2019 (TATOLI)–Prezidente Repúblika (PR), Francisco Guterres Lú Olo, hala’o dialógu aberta ho komunidade iha Jináziu Lospalos,  Munisípiu Lautém, ohin.

Dialógu aberta ne’ebé akompaña hosi espoza Cidália Nobre Guterres ne’e, atu rona direta preokupasaun povu Lautém, liliu kona-ba dezenvolvimentu no problema sosiál ne’ebé povu infrenta iha moris lor-loron.

Diálogu ne’e ho tópiku “Dadalia ho Lú olo, ho diálogu sei hetan solusaun ba problema ne’ebé de’it, ita presiza rekoñese ida-idak nia matenek, kualidade no kontribuisaun”.

Iha diálogu refere, Prezidente Repúblika, Francisco Guterres Lú olo hateten objetivu hosi diálogu ne’e mai hosi programa Prezidente nian, atu rona direta saida mak povu hasoru no Prezidente rasik sei hato’o ba ezekutivu sira oinsá buka solusaun.

“Haksolok tebes tanba ha’u bele mai hamutuk ho ita-boot sira hodi halo diálogu aberta, atu bele ko’alia hamutuk no haree di’ak tan ita-nia moris nu’udar nasaun independente”, Lú Olo ko’alia iha abertura.

Iha introdusaun, Xefe Estadu esklarese katak programa ne’e realiza tanba mai husi kompromisu Prezidente nian rasik, dezde hahú kandidata-aan ba Prezidente Repúblika.

Ne’e signifika, Prezidente esplika, nu’udar Xefe Estadu sei ba hakbesik-aan ba komunidade ho autoridade sira hodi haree situasaun reál.

Lu Olo reforsa liután katak Prezidente Repúblika ne’e hili direita hosi povu liuhusi eleisaun, ho ninia kompeténsia rasik nu’udar órgaun soberania númeru ida iha nasaun ne’e.

“Prezidente Repúblika hanesan órgaun soberania ida ne’ebé iha kbiit hanesan mós ho órgaun sira seluk hanesan Parlamentu Nasionál, Governu no Tribunál sira”, nia hateten.

Partisipa iha diálogu ne’e, Vise Ministra Solidariedade Sosiál no Inkluzaun, Signi Verdial, Vise Ministra Saúde Asuntu Kuidadu Saúde Primária, Elia António dos Reis, Sekretáriu Estadu Arte no Kultura, Teófilo Caldas, reprezentante Organizasaun Nasaun Unida (ONU) iha Timor-Leste, Embaixadór Indonézia ba Timor-Leste, Embaixadór Sahara Osidentál ba Timor-Leste, diplomata balun, membru Parlamentu balun, autoridade munisipál, autoridade lokál no povu Lautém.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here