Diálogu entre Xefe Estadu Lú Olo no komunidade Lautém. Imajen Tatoli/Cipriano Colo

LAUTÉM,  11 outubru 2019 (TATOLI)—Durante diálogu ho Xefe Estadu, Francisco Guterres Lú Olo iha Jináziu Lospalos, Munisípiu Lautém, sesta ne’e, povu hosi munisípiu ne’e husu atu esklarese razaun la fó pose ba membru Governu pendente.

Xefe Suku Rasa, Postu Administrativu Lautém, Armindo Benezato hateten povu iha baze kontinua la komprende kona-ba polémika lista kandidatu membru Governu pendente ne’ebé to’o oras ne’e seidauk simu pose.

“Tuir informasaun ne’ebé ami rona katak Prezidente Repúblika ho Primeiru-Ministru iha diferensa polítika mak to’o oras ne’e membru Governu pendente sira la simu pose. Ida-ne’e loos ka lae? Husu ba Xefe Estadu atu esklarese ba povu didi’ak, nune’e povu bele sai hosi dúvida boot ne’ebé hela ho tempu naruk ona,” nia kestiona.

Aleinde ne’e, Xefe Suku Ililai, Postu Administrativu Lospalos, Luís Januario da Costa husu boot ba Governu no Estadu atu fó liman ba malu hodi hakotu lalais impase polítika iha rai laran.

Kona-ba kestaun ne’e, Prezidente Repúblika, Francisco Guterres Lú Olo hateten nia parte prontu atu fó pose maibé Governu tenke kumpre razaun saida mak Xefe Estadu aprezenta.

“Ha’u hakerek karta ba sira katak  pondera halo didi’ak. Pondera katak tetu halo didi’ak tiha lai mak lori mai ha’u fó pose”,  Xefe Estadu informa.

Prezidente Repúblika deklara katak nia la’ós sai opozisaun ba Governu maibé bazeia ninia kompromisu katak nia sei koopera ho Governu iha kualker aspetu atu rai ida-ne’e bele la’o ba oin.

Tanba ne’e,  liuhosi vizita ida ne’e, Xefe Estadu hakarak  atu rona sujestaun oinsá mak Estadu no rai ne’e bele la’o ba oin no oinsá mak povu nia moris lor-loron bele hetan dalan loos.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here