Xefe Komisaun Organizadora ba Ezame Nasionál, EHT-Becora,Recardino da Costa Fernandes. Foto TATOLI: Nelia Fernandes

DILI, 11 outubru 2019 (TATOLI)-Estudante Eskola de Hospitalidade e Turismo (EHT) Becora hamutuk na’in 13 sei la partisipa iha Ezame Nasionál, iha loron 14 outubru ne´e tanba la tama ona iha eskola durante ne´e.

“Alunu ne’ebé la tuir ezame nasionál na’in 13 tanba balun sai no sira la mai ona,” hateten Xefe Komisaun Organizadora ba Ezame Nasionál, Recardino da Costa Fernandes ba Ajénsia TATOLI, iha EHT-Becora, ohin.

Xefe Komisaun Recardino da Costa informa, estudante ne’ebe la tuir tanba hanesan estudante feto sira kaben sedu, balun muda eskola no balun to’o iha klaran la prontu halo traballu eskola, sira para. “Kona-ba estudante feto sira ne’ebé kaben sedu, durante prosesu aprendizajen iha 2 ano sira tuir mai to’o 3 ano sira ba estajiu to’o estajiu ne’e hotu sira la mai ona, ne’e mak sira la tuir agora”.

Nia reforsa,  EHT nia preparasaun ba eame nasionál atinje ona 95 %, ba estudante sira atu prepara ba exame nasionál dia 14 agora. “Total husi alunu ne’ebé atu partisipa hamutuk 81 maibé ida ne’ebé ativu atu partisipa loloos mak 68 alunu ne’ebé atu tuir ezame agora”.

Xefe Komisaun Organizadora hatutan tan katak, preparasaun 95% ba ezame nasionál. Hahú husi sira-nia matéria, husi númeru ezame, konfirma sira-nia ativa partisipasaun  iha aula durante ne’e, alunu hira mak prontu ona no preparasaun fatin sira buat ne’e hotu, ne’e mak preparasaun 95% hela de’it 5 %. “Orsida (ohin) ami finaliza para segunda bele hala’o exame nasionál”.

Iha parte seluk, Xefe Komisaun Organizadora ba Ezame Nasionál ne´e relata katak, iha EHT ne´e durante hasouru difikuldade mak livru didátiku no mós menus profesór. “Dala ruma disiplina rua, tolu, profesór ida de’it mak hanorin, ida ne’e mak hanesan difikuldade no mós ho sala de aula”.

“Fatin la to’o dala ruma alunu barak  maibé fatin la to’o sorte hanesan agora ne’e hanesan jurusan ha’at ne’e ema seidauk fahe ba rua, agora hanesan otel ne’e to’o ona klase rua,  tinan oin tan dala ruma sei bele klas rua, mas difikuldade seluk la iha,” dehan profesór ne’e.

Nia realsa, EHT-Becora fahe ba departamentu ha’at hanesan, Hotelaria, Kulinaria, Kustura / Modelajen no Beleza.

Entertantu, Eskola de Hospitalidade e Turismo Becora (EHT-Becora), estudante 68 prontu no priense ona kritéria para tuir ezame nasionál iha 14 semana oin.

Notísía relevante:MEJD Hahú Distribui Pontus Ezame Nasionál

Jornalista : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here