Celestina da Costa Ximenes hato’o palestra durante foti pozisaun hanesan Embaixadora Estadus Unidus Amerika mai Tmor-Leste akompaña husi atuál Embaixadora Kathleen Fitzpatrick. Imajen/Eugénio Pereira

DILI, 11 outubru 2019 (TATOLI)-Estudante Timoroan, Celestina da Costa Ximenes (tinan 13), iha oras ida nia laran,  ohin dadeer, asume knar Embaixadóra Estadus Unidus Amerika mai Timor-Leste.

Notísia Relevante : Abrilia, Komisária KNDL Loron Ida

Estudante Eskola Nunumoge Ainaro ne’e akompaña Embaixadóra Amerika atuál, Kathleen Fitzpatrick, hodi konvoka enkontru ho funsionáriu tomak Embaixada Amerika nian.

Embaixadóra oras ida,  Celestina  da Costa Ximenes, hala’o mós vizita ba partisipa serimónia selebrasaun tinan 10 servisu konsekutivu Forsa Navál SEABEES nian iha Timor-Leste no serimónia troka komandu SEABESS batallaun da-haat (4)  ba batallaun da lima (5) ne’ebé hala’o iha rezidénsia Forsa Navál, Comoro, Dili.

Embaixadóra Celestina partisipa iha PLAN International nia programa “Girls’ Takeover” ne’ebé fó oportunidade ba labarik feto sira iha mundu tomak atu ko’alia kona-ba igualdade, hasoru feto profisionál sira no asume papél lider governu no komunidade nian ba loron ida hodi aprende kona-ba lideransa.

“Ha’u orgullu tebes bele reprezenta feto hodi sai Embaixadóra durante oras ida,” hateten Celestina.

Embaixadóra Celestina dada lia ho Eis Presidente Repúblika, José Ramos Horta, Ministra Edukasaun Juventude no Desportu (MEJD), Dulce de Jesus no Vise Xefe Estadu Maiór Jenerál FALINTIL-Forsa Defeza Timor-Leste, Falur Rate Laek hodi ko’alia kona-ba ninia preparasaun ba futuru hakarak sai doutora.

Laureadu Nobel Pás nian, José Ramos Horta durante hala’o konversa husu mós pergunta preparasaun Embaixadóra ne’e ba ninia futuru.

“Señora Embaixadóra Cristina, karik aban bairua boot ona, ita hakarak sai saida?. “Ha’u hakara sai doutora, tanba ha’u gosta matéria matemátika, Ingles no Portugés,” Cristin lia tun ba Ramos Horta.

Fatin hanesan, Embaixadóra Kathleen Fitzpatrick haksolok tebes partisipa iha programa “Girls’ Takeover.” Tanba nia mós konsidera importante tebes ba labarik feto sira atu haree saida mak posivel no introdús sira ba modelu profisaun sira dezde sira nia tinan sei ki’ik.

Embaixadóra Celestina hala’o ona papél importante iha Embaixada nia atividade ohin loron nian. Nia halo diskursu iha serimónia Troka Komandu Forsa Naval EUA nian no lidera enkontru semanál funsionáriu Embaixada EUA nian.

“Servisu furak, Embaixadóra Celestina!,”  hateten  Kathleen Fitzpatrick.

Iha fatin hanesan, Ministra Edukasaun, Juventude no Desportu, Dulce de Jesus Soares hato’o parabéns ba Embaixadóra Cristina no Plan Internasionál nia programa.

“Parabéns Embaixadóra Celestina, ohin rona ita boot hakarak aprende matemátika, loos iha Timor-Leste tuir dadus ita nia númeru alunu menus tebes iha matemátika, governu sei halo esforsu atu lori Timoroan barak aprende matéria matemátika sai barak liu tán,” Ministra Dulce hateten.

Atividade Take Over realiza husi PLAN Internasionál nu’udar inisiativa di’ak ida hodi promove alin feto sira iha Timor laran tomak, liu-liu atu alin feto sira fiar iha sira-nia aan katak, sira mak futuru ba Timor-Leste, entaun sira tenke prepara aan, liu husi partisipa iha atividade sira ne’ebé iha, atu to’o iha tempu ruma sira bele kontinua dezenvolvimentu liu husi lidera nasaun ida ne’e.

Programa ne’e, PLAN la’ós de’it realiza iha Timor-Leste, maibé mós iha nasaun hitu-nulu (70) resin iha mundu ne’ebé PLAN Internasionál servisu ba ho objetivu atu promove alin feto sira iha prosesu foti poder iha futuru. Tan ne’e, alin feto sira aprende kedas husi agora, hodi prepara sira ba sira-nia futuru.

Prosesu labarik feto foti pozisaun Take Over ne’e abranje parte hotu, no sai nu’udar empoderamentu ida ba alin feto hotu-hotu, atu oinsá sira bele sai feto ne’ebé iha poténsia ba futuru Timor-Leste.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here