Prezidente Parlamentu Nasionál, Arão Noe de Jesus Amaral. Imajen/António Gonçalves

DILI, 10 setembru 2019 (TATOLI) – Parlamentu Nasionál (PN) iha tempu badak sei enkamiña reapresiasaun foun ba Dekretu Parlamentu Nasionál nú.9/V–segunda alterasaun Lei nú.9/2005, 3 agostu kona-ba Lei Fundu Petrolíferu (LFP) no Dekretu Parlamentu Nasionál nú.10/V–segunda alterasaun Lei nú.13/2013, 2 setembru kona-ba Lei Atividade Petrolífera (LAP).

Prezidente Parlamentu Nasionál (PPN), Arão Noé de Jesus da Costa Amaral, hateten iha posibilidade ohin lorokraik PN bele enkamiña dekretu rua ne’e ba Prezidente Repúblika (PR), Francisco Guterres ‘Lú Olo’, tanba Komisaun C trata asuntu Finansa Públika no Komisaun D trata asuntu Ekonomia no Dezenvolvimentu konklui ona textu finál iha loron kuarta ne’e.

Notísia Relevante: PN Reapresia Ona LFP, Mantein Artigu Ne’ebé TR deside Inkonstitusionál

“Ha’u baixa ba DIPLEN (Divizaun Apoia Plenáriu) atu prepara textu finál. Orsida reuniaun líder bankada hotu ha’u asina hotu haruka kedas ba Prezidente Repúblika”, tenik Arão Noé ba jornalista sira iha resintu PN, kinta ne’e.

Nia dehan, tuir lei Xefe Estadu iha loron 30 nia-laran hodi foti desizaun veta ka promulga.

“Bainhira loron 20 nia laran maka la haruka ba Tribunál Rekursu, entaun durante loron 30  nia laran Prezidente Repúblika bele promulga ka veta polítik”, nia esplika.

PN halo ona re-apresiasaun ba Dekretu Parlamentu Nasionál rua ne’e hanesan proposta foun iha loron tersa (08/10) no pasa ho votu maioria.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here