Lospalos-oan, Arsénio da Costa Pinto Cabral, ne’ebé hola inisiativa hodi harii empreza produsaun nuu ho naran ‘Lospalos Pure Coconut Oil’, esplika prosesu produsaun ba Prezidente Repúblika, Francisco Guterres Lú Olo ho espoza. Imajen TATOLI/Cipriano Colo

LAUTÉM, 10 outubru 2019 (TATOLI) – Prezidente Repúblika (PR), Francisco Guterres Lú Olo, konsidera produsaun mina nuu iha Aldeia Lou Uru, Suku Soru, Postu Administrativu Lospalos, Munisípiu Lautém, sai ezemplu ba timoroan hotu iha Timor-Leste (TL).

Konsiderasaun ne’e tanba fatin barak mak iha nuu, maibé seidauk iha rekursu umanu ka inisiativa hosi timoroan sira atu oinsá halo produsaun atu bele dezenvolve indústria iha rai ne’e.

Xefe Estadu hateten atu dezenvolve indústria rasik inisiativa tenke maihusi timoroan rasik. Tanba ne’e, Prezidente Repúblika apresia no fó parabéns ba joven Arsénio da Costa Pinto Cabral hosi aldeia refere, maski Estadu seidauk fó apoiu ruma maibé konsege fó serbisu ba timoroan na’in sanulu resin rua.

“Joven Arsénio merese duni atu fó parabéns inklui ema hotu ne’ebé involve iha prosesu produsaun tomak”, Prezidente apresia.

Iha fatin hanesan, Arsénio da Costa Pinto Cabral ne’ebé hola inisiativa harii empreza produsaun ho naran ‘Lospalos Pure Coconut Oil’, espresa sentimentu kontente tanba Prezidente Repúblika bele hiit aan mai to’o fatin ne’ebá hodi haree direta kondisaun produsaun.

Nia aprezenta difikuldade sira ba Prezidente Repúblika katak situasaun ne’ebé nia hasoru mak nuu ne’ebé nia iha mak nuu ne’ebé uluk avó sira kuda no ba oin sei hasoru  difikuldade kona-ba matéria prima.

Maski nune’e, nia sei esforsu nafatin atu serbisu hamutuk ho Prezidénsia Repúblika no Governu atu oinsá halo planu di’ak ba produsaun di’ak liután iha futuru.

Arsénio harii empreza refere tanba hetan inspirasaun hosi Inglaterra, hafoin  hala’o serbisu iha ne’ebá kuaze tinan sanulu.

Aleinde ne’e, iha inísiu produsaun, Arsénio hetan apoiu hosi  membru forsa ba pás, International Forces for East Timor (INTERFET) na’in rua ho naran Shenon ho Steve hosi Austrália.

“Produsaun ne’e ha’u hahú iha tinan 2018, ne’ebé loron ida prodúz litru 40, no fa’an ba empreza Pateo inklui esporta ona ba Austrália. Oras ne’e daudaun, ami iha funsionáriu na’in 12, konta mós ho feto faluk na’in rua, ho saláriu ema ida kada fulan $150,” Arsénio haktuir.

Iha fatin hanesan, Embaixadór Austrália iha Timor-Leste, Peter Roberts fó mós parabéns ba Arsénio ne’ebé iha inisiativa hodi harii empreza produsaun ba mina nuu.

Nia enkoraja Arsénio atu kontinua dezenvolve inisiativa ne’e atu bele halo di’ak liután Iha futuru.

Entretantu, traballadora Mafalda da Costa ne’ebé serbisu iha empreza ne’e sente katak iha duni vantajen ba nia tanba kada fulan bele manán osan $150 hodi sustenta família no selu eskola ba oan na’in haat.

Iha vizita ne’e, Prezidente Repúblika akompañada hosi espoza Cidália Mouzinho Guterres, Ministru Agrikultura no Peska, Joaquim Gusmão, Vise Ministru Obra Públika, Nicolau Lino Freitas, Sekretáriu Estadu Arte no Kultura, Teófilo Caldas, Sekretáriu Estadu Ambiente, Demétrio Amaral, Vise Ministra Solidariedade Sosiál no Inkluzaun, Signi Verdial no membru Parlamentu balun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here