Pesoál Saúde iha Sentru Saúde Internamentu Nível 2 Lospalos, simu Prezidente Repúblika, Francisco Guterres Lú Olo ho tara tais. Imajen Mídia PR

LAUTÉM, 10 outubru 2019 (TATOLI) – Prezidente Repúblika (PR), Francisco Guterres Lú Olo, husu pesoál saúde iha Sentru Saúde Internamentu Nível 2 Lospalos, hodi hasa’e prestasaun servisu.

Xefe Estadu husu ne’e, tanba pesoál saúde sira-nia kna’ar mak salva povu nia vida.

“Simplesmente, ita-boot sira-nia servisu atu salva povu nia vida. Povu presiza isin di’ak atu partisipa iha prosesu dezenvolvimentu nasionál, tanba saúde importante liu hahú hosi labarik to’o ema boot”, PR Lú Olo husu ne’e bainhira hala’o vizita ba Sentru Saúde Internamentu Nível 2 Lospalos, Munisípiu Lautém, ohin.

PR Lú Olo husu atu servisu fó aan hodi redúz númeru mortalidade labarik nian tanba kauza hosi moras oioin iha rai ne’e.

Xefe Estadu ne’e mós rekoñese katak atu halo servisu di’ak, ema tenke iha kondisaun di’ak. Tanba ne’e, Xefe Estadu iha ona hanoin atu fó hanoin ba Governu oinsá iha tinan oin presiza halo edifísiu Sentru Internamentu ne’e foun no di’ak liu, nune’e doutór sira halo prestasaun servisu di’ak liu.

Prezidente deklara katak úniku situasaun ida-ne’e mak ema hotu nia hakarak, no hein hosi lolo liman Governu nian.

Nia fiar katak Governu ida-ne’e bele halo buat hotu ho di’ak no iha marsu tinan oin oinsá haree hodi halo reabilitasaun no konstrusaun Sentru Saúde sira iha Lospalos, Viqueque no Remexio-Aileu.

Iha fatin hanesan, Diretór Servisu Saúde Munisipál Lautém, Bernardo Amaral hateten sira iha ona planu atu iha tinan oin sei hasa’e Sentru Internnamentu ne’e ba nível 3, inklui reabilitasaun totál ba Sentru Saúde ne’e rasik no iha tinan ida-ne’e sei harii sala hakmatek iha internamentu.

Sentru Saúde Internamentu Nível 2 Lospalos ne’ebé lokaliza iha Postu Administrativu Lospalos ho totál populasaun 33.293 mai husi suku 10, postu Siska 10, aldeia 52 ho postu tratamentu 2.

Sentru Saúde Nível 2 ne’e mós iha sala observasaun ka internamentu ne’ebé ho kama 32, forsa traballu kompostu hosi médiku na’in 21 inklui médiku Kubanu 2, infermeiru no infermeira na’in 21, parteira na’in 12 no tékniku aliadu na’in 31, tanba ne’e totál pesoál saúde hamutuk na’in 85.

Tuir dadus, iha fulan tolu ba kotuk, Sentru Saúde Internamentu ne’e, rejista moras aas liu maka infesaun  via respiratóriu okupa númeru primeiru, diareia no seluk-tan.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here