Inspetór Jerál Traballu (IJT), Rofino Lopes dos Reis. Imajen Tatoli/Antónia Gusmão.

DILI, 10 outubru 2019 (TATOLI) – Inspetór Jerál Traballu (IJT), Rofino Lopes dos Reis, hateten lei traballu ne’ebé daudaun iha ne’e seidauk sufisiente atu apoia serbisu hodi halo inspesaun, tanba ne’e persiza tan lei seguransa saúde traballu.

“En termu lei ami sei hasoru difikuldade iha lejizlasaun balu ne’ebé seidauk kompletu, liuliu lejizlasaun liga ho seguransa saúde traballu, tanba haree dezenvolvimentu indústria komesa la’o daudaun en termu konstrusaun hotu. Tan ne’e lei seguransa saúde traballu ne’e importante nune’e bele fasilita inspetór sira para bele halo inspesaun ne’e ho di’ak liután”, afirma Rofino Lopes dos Reis iha nia knaar fatin Kaikoli, ohin.

Nia hatutan : “Dala barak ami bá ejize ema tenke la’o tuir lei, más realidade ita rasik iha kondisaun balu seidauk kompletu. Lei traballu de’it seidauk sufisiente tanba ne’e jerál de’it, maibé en termu seguransa saúde traballu ne’e iha iha lei traballu ne’e rasik sita de’it artigu tolu, entaun presiza tan lei própria ida”, katak.

Tanba ne’e, Rofino dehan ezbosu ba lei saúde traballu ne’e submete ona ba Ministru Reforma Legislativa no Asuntu Parlamentar (MRLAP).

Entretantu ezbosu lei refere iha mandatu Governu VI lori ona ba Konsellu Ministru, maibé la konsege diskute tanba mudansa governasaun.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here