BOBONARO, 10 outubru 2019 (TATOLI)-Durante períodu fulan sia (9) nia laran, husi janeiru-setembru, tinan ne’e, Polisia Nasional Timor-Leste (PNTL) Munisípiu Bobonaro kobre ona reseita $18.716 hodi kontribui ba kofre Estadu.
Notísia Relevante :PNTL Bobonaro Kontribui Rihun US$70 ba Reseita Estadu
Komandante PNTL Munisípiu Bobonaro, Superintendente Xefe Polisia Octávio de Araújo Bucar ba Ajénsia TATOLI, tersa (08/10/2019), informa, reseita hirak ne’e rekolla husi atividade operasaun pasa-revista ba transporte públiku ne’ebé komete infrasaun tránzitu tanba laiha karta kondusaun, KIR mate, kontra sinais tránzitu no seluk tan.
Durante fulan sia ne’e, PNTL Bobonaro reziste mós kazu asidente tránzitu hamutuk 30-resin ne’ebé rezulta ema na’in rua mate no seluk sofre kanek todan no kmaan.
Kazu asidente hirak ne’e, kompostu husi motor ho motor soke malu hamutuk 23, karreta ho motor soke malu iha kazu sira (9), karreta ho karreta (2), ema monu husi karreta (1), motor soke ema (5), motor soke deker (asidente tunggal) (1), motor riba ema (3), karreta soke ema (1), karreta soke riin eletrisidade (1).
Komandante Polisia Munisípiu Bobonaro ne’e apela ba motorista sira atu respeita sinais tránzitu no proibidu konsume tua bainhira lori karreta ka motor.
Jornalista : Nelson de Sousa
Editór : Francisco Simões
