Sekretáriu Estadu Formasaun Profisionál no Empregu, Julião da Silva. Imajen/Tatoli.

DILI, 10 outubru 2019 (TATOLI) – Iha kinta ne’e, Sekretáriu Estadu Formasaun Profisionál no Empregu, Julião da Silva, hala’o soru-mutuk ho Primeiru-Ministru (PM), Taur Matan Ruak hodi ko’alia kona-ba tendénsia ne’ebé mosu iha Sekretaria Estadu Formasaun Profisionál no Empregu (SEFOPE) relasiona ho rekrutamentu serbisu iha Austrália.

“Ha’u mai informa hela ba Primeiru-Ministru kona-ba kestaun uituan ne’ebé sosiedade kestiona. Ezemplu ida kona-ba rekrutamentu ba serbisu iha Austrália no Koreia ninian,” tenik Julião iha Paláçio do Governo.

Nia haktuir, prosesu hotu hato’o ona ba Komisaun Antí-Korrupsaun (CAC-sigla Portugês), Provedoria Direitu Umanu no Justisa (PDHJ-sigla Portugês) no Komisaun Funsaun Públika (KFP), nune’e fiar katak semana oin bele hetan ona relatóriu balun.

“Fiar katak entrega ona ba ita-nia ekipa independente sira ne’e bele lori ita-nia serbisu sira la’o di’ak liután. Tuir krítika sira hosi ita-nia sosiedade hato’o katak tendénsia nepotizmu. Sosiedade iha direitu para halo protesta nune’e Governu mós bele tau atensaun maka’as liután ba serbisu sira,” nia subliña.

Julião esplika, tendénsia ne’ebé mosu loos ka la loos, hein rezultadu hosi auditoria ne’ebé órgaun independente sira hala’o ona.

“Kuandu rezultadu fó sai katak funsionáriu públiku mal komete, ita tenke prosesu tuir lei Funsaun Públika nian ne’ebé iha,” katak governante ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here