Merkadu Motaain ne'ebeé Governu harii iha tinan 2017 maibé abandonadu. Imajen/António Gonçalves

DILI, 10 outubru 2019 (TATOLI) – Asesór Prinsipál Ministériu Turizmu, Komérsiu no Indústria (MTKI), Jacinto Rigoberto, hatete MTKI sei koordena ho ministériu relevante hodi haree ba funsionamentu merkadu Mota-Ain.

“MKIA sei koordena hamutuk ho ministériu relevante hodi haree ba merkadu ne’e nian funsionamentu para bele la’o di’ak tuir akordu ne’ebé maka Indonézia, Timor-Leste halo atu funsiona setór turizmu, komérsiu tuir akordu border pass iha baliza nasaun rua ninian”, katak asesór prinsipál MTKI iha Komoro, ohin.

Tanba ne’e nia dehan merkadu ne’e iha baliza entre rai rua nian, entaun tenke inter-ligadu ho Ministériu Estatál, Ministériu Negósiu Estranjeiru no Kooperasaun no parte seguransa atu haree fali oinsá merkadu ne’e nian funsionamentu.

“Tanba ita inisia ona akordu, Indonesia no Timor-Leste kona-ba funsionamentu merkadu iha fronteira ne’ebé merkadu ida ne’ebá ne’e aban-bainrua di’ak liu”, haktuir Jacinto Rigoberto.

Entretantu nia dehan merkadu Mota-Ain ne’ebé MTKI konstrui iha 2017 ninia funsionamentu maka ladún la’o no seidauk tau atensaun másima. “Merkadu ne’ebá ne’e la’ós abandonadu, maibé seidauk funsiona ho di’ak”, dehan Jacinto Rigoberto.

Merkadu tradisionál ne’e konstrui iha Governu Konstitusionál Dahituk nia mandatu liuhusi Ministériu Komérsiu, Indústria no Ambiente (MCIA, sigla portugés) iha Postu Administrativu Balibó, Munisípiu Bobonaru, ho intensaun komersiál bele fasilita komunidade sira iha liña fronteira Timor-Leste ho Indonézia halo tranzasaun merkadoria.

Ho nune’e, Xefe Suku Batugadé, Januário Moises, husu ba Governu atuál ne’ebé lidera husi Primeiru-Ministru (PM), Taur Matan Ruak, atubele re-funsiona fali merkadu ho nia fasilidade ne’ebé estabelese nanis ona iha 2017.

Merkadu refere estabelese ho sala pur volta 20-resin, tenda provizóriu ba loke restaurante, maibé maioria la uza no balun okupa husi negosiante ho eskalaun negósiu ki’ik.

Governu Timor-Leste ho Indonézia iha tinan hirak liubá iha ona konkordánsia atu loke bazar baratu iha fronteira hodi fa’an produtu lokál husi nasaun ida-idak, maibé to’o ohin loron seidauk implementa ho di’ak.

Notísia relevante : Merkadu Tradisionál Motaain “Abandonadu”

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here