Diretór Nasionál ba Asuntu Legál, Ministériu Justisa (MJ), Nelinho Vital

DILI, 09 outubru 2019 (TATOLI)—Diretór Nasionál ba Asuntu Legál, Ministériu Justisa (MJ), Nelinho Vital, hateten enkontru ohin halo diskusaun kona-ba preparasaun Timor-Leste nian tama ASEAN no prosesu atu halo ratifikasaun ba konvensaun ASEAN nian kona-ba kontra terrorizmu.

“Ohin, husi parte justisa nian ko’alia kona-ba kodigu penál artigu 131, 132, 133 ne’ebé ko’alia kona-ba terrorista no lei kona-ba brankeamentu kapitál nian. Ita iha dekretu lei kona-ba kriasaun  intelejénsia finanseira no mós padraun legál balun seluk ne’ebé ita iha atu nune’e bainhira ita tama ASEAN ka ratifika konvensaun ne’e ita hadi’a ka altera tuir lei konvensaun ne’ebé ita iha,” dehan Diretór Nasionál ba Asuntu Legál, Nelinho Vital, ba Ajénsia TATOLI liuhusi entrevista  iha Ministériu Negosiu Estranjeiru, Avenida Portugal, Dili, kuarta (09/10/2019).

Nia hatutan, Timor-Leste tenke halo prosesu ratifikasaun ba iha Parlamentu Nasionál no tenke prepara leis nasionál ba implementa konvensaun kona-ba kontra terrorizmu ASEAN nian ne’e. Hafoin, tuir nia, Timro-Leste tenke kria autoridade sentrál hodi implementa ka akompaña implementasaun programa no prepara planu asaun ba implementasaun konvensaun ida ne’e nomós halo serbisu ba prevensaun ninian.

Iha parte justisa esforsu saída mak Timor-Leste presiza hadi’a di’ak liután, Diretór Nelinho hatán,  Timor-Leste iha Polísia Sientífiku Kriminál (PSIK) ne’ebé ninia diresaun ida toma konta ba Interpol. Tanba ligasaun ho terorista ne’e, nia dehan, ligasaun la’os iha kestaun nasionál maibé ida ne’e kestaun krimi trans nasionál.

“Entaun agora ita [Timor-Leste] tenke kapasita tiha ona Interpol hadi’a relasaun bilaterál, multilaterál no relasaun internasionál ninian. Depois ita reforsa ita-nia lei nasionál ne’ebé ita iha. Se ita ratifika, ita tenke reforsa atu nune’e bele kumpri duni konvensaun ASEAN nian,” nia esplika.

Notísia relevante:MNEK Ho Liña Ministeriál  Ko´alia Elementu Krítiku Adezaun Bazeia Ba Pilár “Blue Print” ASEAN

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here