Ministru Transporte no Komunikasaun, José Agostinho da Silva. Imajen/Tatoli.

DILI, 09 outubru 2019 (TATOLI) – Ministru Transporte no Komunikasaun, José Agustinho da Silva, hamutuk ho Komisaun Nasionál Aprovizionamentu (CNA-sigla portugés) aprezenta proposta deliberasaun rua iha reuniaun Konsellu Ministru (KM) kuarta ne’e, kona-ba prosesu aprovizionamentu antesipadu atu atualiza banda larga satélite internet iha instituisaun estadu sira.

Nune’e, sei atualiza banda larga husi 200 mbps (megabit pur segundu) ba 1 gbps (gigabit pur segundu) no emenda kontratu hodi atualiza fali banda larga satélite husi 100 mbps ba 200 mbps.

Maski nune’e, Governu sei halo analiza fila-fali ba proposta ne’e no sei aprezenta iha reuniaun ezekutivu tuir mai.

Ministru José Agustinho esplika durante ne’e velosidade ne’ebé oferese ba instituisaun estadu sira ho kapasidade 200 mbps de’it tanba ne’e la sufisiente.

“200 mbps durante ne’e ita oferese ba instituisaun estadu hamutuk 140, entaun kada instituisaun hetan de’it 2 mbps. Impaktu mak velosidade internet sei la la’o di’ak”, tenik governante ne’e iha Palásiu Governu.

Tanba ne’e, nia dehan, Ministériu Transporte no Komunikasaun (MTK) nu’udar ministériu responsável, aprezenta planu hodi atualiza velosidade internet husi 200 mbps ba 1 gbps, ne’ebé ekivalente ho 1000 mbps.

José Agustinho haktuir, iha biban reuniaun ezekutivu, Primeiru-Ministru, Taur Matan Ruak, orienta atu ekipa tékniku husi parte MTK bele koordena didi’ak hodi fó solusaun.

“Agora iha prosesu nia laran. Ita iha operadór estranjeiru sira nu’udar fornesidór banda larga internet maibé ita mós iha timoroan sira ne’ebé iha kapasidade tékniku iha área informátika. Tanba ne’e, oportunidade atu ita promove sira tanba labele depende de’it ba operadór estranjeiru sira”, nia akresenta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here