Edifísiu Inspesaun Jerál Traballu (IJT). Imajen Tatoli/Antónia Gusmão.

DILI, 10 outubru 2019 (TATOLI) – Ministru Koordenador Asuntu Ekonómiku (MKAE) interinu, Fidélis Manuel Leite Magalhães, ohin, hala’o vizita ba Inspesaun Jerál Traballu (IJT) ho objetivu atu rona diretamente preokupasaun IJE nian.

“Nu’udar MKAE interinu ha’u tenke mai rona Inspesaun Jerál liuliu inspetór no inspetora sira ninia preokupasaun, nune’e bainhira avansa ba diskusaun sira tuirmai iha Parlamentu no Governu hatene didi’ak ona sira-nia realidade, se lae la komprende didi’ak no koalia tun-sa’e de’it”, dehan Fidelis hafoin vizita hodi haree fatin sira ne’ebé funsionáriu IJT haknaar aan ba hodi serví públiku iha Kaikoli, ohin.

Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, hala’o enkontru ho Inspesaun Jerál Traballu (IJT), Kinta (10/10/2019). Imagén Tatoli/Antónia Gusmão.

Ministru Koordenadór ne’e haktuir durante hala’o enkontru rona kestaun maka kona-ba IJE nia lei orgánika no ne’e importante atu regula estatutu para bele autonomiza sira-nia aan, nune’e hala’o servisu ho autonomia liután hanesan inspesaun jerál ida.

Atuál Ministru Reforma Lejizlativa no Asuntu Parlamentár ne’e dehan, aléinde lei organika, IJT mós iha preokupasaun kona-ba espasu ba serbisu.

“Kona-ba sira-nia fatin, loos duni ha’u rasik verifika ne’ebé tenke duni tau-matan ba kondisaun ne’ebé sira iha durante tinan barak, no fatin ne’e la dignifika sira enkuantu ajénsia reguladora ida. Tanba ajénsia ida ne’ebé tenke impoen kumprimentu lei liuliu liga ho setór privadu sira barabarak entaun tenke iha kondisaun ida digna”, afirma Fidelis.

Governante ne’e dehan, knaar IJT nian atu ajuda empregadór no serbisu-na’in atu hetan protesaun hotu hosi lei traballu ne’ebé iha ona.

Tanba ne’e, MKAE interinu ne’e enkoraja nafatin IJT atu hala’o servisu tuir lei, tanba atu haruka ema seluk halo tuir lei IJT rasik tenke hatene uluk kumpre lei, tan ne’e inspetór sira atu justu iha aplikasaun lei.

Inspetór Jerál Traballu, Rofino Lopes dos Reis, hatutan preokupasaun ne’ebé durante ne’e mak estrutura organika IJT nian, nune’e mós espasu ba sira hodi halo serbisu.

“Preokupasaun ne’ebé iha maka ami seidauk iha estrutura organika ida, ami iha inspetór jerál de’it entaun susar ba ami atu ezerse ami-nia servisu ho di’ak liután, maibé Ministru Koordenadór promete sei haree ezbosu ne’ebé agora daudauk iha ona MKAE”, dehan Rofino.

Daudaun ne’e IJT utiliza cube house hodi hala’o servisu no atendimentu ba públiku.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here