Koordenadór Coperativa Café Timor, Felisberto Pereira Pinto, esplika hela prosesamentu produsaun aifarina ba Xefe Kaza Sivíl, iha Pato, Lospalos. Imajen Mídia PR

LAUTÉM 10 outubru 2019 (TATOLI)–Kada Semana, Coperativa Café Timor (CCT) fornese aifarina ba kompañia Heineken atu uza hodi prodúz serveja liurai.

Jerente Coperativa Café Timor, Felisberto Perreira Pinto, informa asuntu ne’e ba Xefe Kaza Sivíl, Francisco Maria de Vasconselhos ne’ebé reprezenta Prezidente Repúblika (PR), Francisco Guterres Lú Olo hodi vizita direta ba Sentru Prosesamentu Aifarina ne’ebé fó énfaze ba utilizasaun rai ba produsaun, iha Pato, Suku Fuiluro, Postu Administrativu Lospalos, ohin.

“Atu bele hetan tonelada 25, CCT fahe aifarina kain no sosa hosi agrikultór hamutuk besik 2000 iha Munisípiu Lautém”, nia tenik.

Durante ne’e, nia haktuir, iha difikuldade boot ba matéria prima, tanba ne’e, parte kompañia Heineken husu CCT atu hasa’e tan kuantidade produsaun atu bele esporta ba Filipina no Nova Papua Guiné.

Jerente ne’e hatutan katak Coperativa Café Timor hahú kuda aifarina iha Munisípiu Lautém iha 2014 no CCT aluga rai ho luan ektare 25 hosi Estadu ho kontratu durante tinan-25.

Aleinde kuda aifarina, nia tenik, CCT introdúz mós kafé robusta, vanili, cacao, kraviñu (cengkeh) no pimenta ba agrikultór iha Munisípiu Lautém kuda.

Iha intervensaun, Xefe Kaza Sivíl Prezidénsia Repúblika, Francisco Maria de Vasconselhos, hateten ho produsaun mak povu ida bele dezenvolve-aan. Lahó produsaun, ema sei sai estranjeiru iha nia rai rasik.

Nune’e, Xefe Kaza Sivíl subliña, produsaun hosi forsa rai-laran rasik sei hametin liután ekonomia nasaun ne’ebé hahú hosi uma kain ida-idak nian.

Francisco agradese apoiu hosi Governu Estadu Unidu Amérika ne’ebé tulun CCT hasa’e produsaun agríkola ba indústria.

Nia mós apresia serbisu hosi Ministériu Agrikultura no Peska (MAP) ne’ebé kontinua promove agrikultura.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here