Autoridade Munisipál Lautém ho komunidade simu Prezidente Repúblika, Francisco Guterres Lú Olo ho espoza iha fronteira entre Munisípiu Lautém - Baucau. Imajen TATOLI/Cipriano Colo

LAUTÉM, 9 outubru 2019 (TATOLI) – Prezidente Repúblika (PR), Francisco Guterres Lú Olo, husu lisensa iha fronteira entre Munisípiu Baucau ho Lautém (Suku  Ililai-Laivai) molok hala’o vizita ba Munisípiu Lautém, ohin.

Xefe Estadu husu lisensa ne’e, bainhira Autoridade Munisipál Lautém hamutuk ho populasaun hosi Suku Ililai-Laivai, Postu Administrativu Lautém, simu nia iha fronteira refere.

“Programa vizita ne’e hanesan ho programa Prezidente nian ne’ebé hala’o ona iha munisípiu sira seluk. Ha’u kontente atu hasoru malu ho populasaun iha Munisípiu Lautém”, Lú Olo hateten ba autoridade no populasaun iha fronteira Ililai-Laivai.

Xefe Estadu hatutan, durante loron tolu nia laran hakarak atu haree direta kondisaun reál no rona preokupasaun povu hosi munisípiu ne’e.

Autoridade no populasaun simu Xefe Estadu ho lia dadolin hodi fó boa-vinda, tara tais akompaña ho tebe-tebe.

Xefe Estadu akompañadu hosi espoza Cidália Mouzinho Lopez Nobre Guterres, Xefe Kaza Sivíl, Francisco Maria de Vasconselhos, Adjuntu Xefe Kaza Militár, Superintendente Eugénio Pereira.

Durante viajen Prezidente Repúblika ho delegasaun, hetan seguransa hosi Polísia Nasionál Timor-Leste (PNTL) Munisípiu Lautém no membru FALINTIL-Forsa Defeza Timor-Leste (F-FDTL) hosi Kaza Militár.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here