Aktividade iha Fronteira Motaain, Bobonaro, Imajen/Antonio Goncalves

BOBONARO, 09 outubru 2019 (TATOLI)-Organizasaun Nasoins Unidu ba Dezenvolvimentu (UNDP-sigla Inglés) fó tulun tékniku hodi prodús ona Planu Estratéjiku  Dezenvolvimentu Munisipál (PEDM) ba Munisípiu Bobonaro.

Notísia Relevante : Bobonaro Hakarak Sosa Karreta Tula Lixu

Prezidente Autoridade Munisípiu Bobonaro, Jeferino dos Santos. Imajen/Antonio Goncalves

PEDM ne’e nu’udar mata dalan ba dezenvolvimentu bainhira governu estabelese ona Kamara Munisipál iha futuru.

Konsellu Konsultivu Munisipál  kompostu husi xefe Suku  50, lia na’in 50 , veteranu na’in rua, reprezentante igreja na’in rua, organizasaun feto na’in rua, joven na’in rua hamutuk ho prezidente autoridade no sekretária, ne’ebé tuir planu sei aprova PEDM ne’e iha loron 14 outubru 2019 iha Bobonaro.

UNDP nia tekniku sira mós fasilita kapasitasaun ba Xefe Suku, Xefe Aldeia sira no Konsellu Suku sira  ne’ebé pertense ba Bobonaro kona-ba desentralizasaun administrativa no podér lokál.

Ba Ajénsia TATOLI iha Bobonaro, tersa (08/10/2019), Prezidente Autoridade Munisípiu Bobonaro, Jeferino dos Santos, esplika, PEDM ne’e kobre área hotu hanesan, edukasaun, saúde, agrikultura, justisa, ekonomia no seluk tan.

Tuir monografia Munisípiu Bobonaro iha 2015 relata   abitante  hamutuk 111.006 maka hela iha aldeia 193, suku 50 husi postu administrativu neen (6) kompostu husi Atabae ho abitante 12.926, Balibo (17.670), Bobonaro (29.161), Kailako (12.152), Lolotoe (8.392) no Maliana  (30.705). Munisípiu Bobonaro ho nia luan 1.368,12 metru kuadradu.

Prepara Kondisaun simu Desentralizasaun

Prezidente Autoridade Munisípiu Bobonaro, Jeferino dos Santos, mós informa, daudaun ne’e nia parte hamutuk ho nia povu sira kontinua hala’o preparasaun, intermus  kondisaun infraestrutura bázika no rekursu umanu hodi simu desentralizasaun podér ne’ebé tuir planu Governu sentrál sei implementa iha 2021.

Serbisu tékniku ne’ebé Bobonaro halo daudaun mak reabilitasaun no konstrusaun foun ba edifísiu públiku sira, estrada no area importante seluk.

Liga ho  rekursu umanu, Bobonaro oan sira  daudaun ne’e iha ona funsionáriu permanente 2.400-resin kompostu husi administrasaun 400-resin, profesór, profisionál saúde, Polisia ho seluk tan.

‘’Ami prepara rekursu uma agora daudaun ha’u nia diretór serbisu munisipál lubuk ida ba tuir formasaun iha rai li’ur (Indonézia), hodi reforsa abilidade tékniku,’’ hateten Jeferino dos Santos.

Jornalista     : Nelson de Sousa

Editór            : Francisco Simões

HAKEREK NO HATÁN

Please enter your comment!
Please enter your name here