Vise Xefe Bankada FRETILIN, Francisco Miranda Branco. Imajen Tatoli/Egas Cristóvão

DILI, 09 outubru 2019 (TATOLI) – Prezensa Amu Papa João Paulo II iha 12 outubru 1989 iha Tasi Tolu, hamosu movimentu juventude barak reziste hasoru okupasaun ilegál Indonézia.

“Loron 12 outubru importante no loron istóriku ba ita tanba determina mós atensaun mundu tomak-nian ba Timor-Leste hafoin hamosu movimentu juventude barak ne’ebé komesa hala’o atividade rezisténsia iha Dili laran ne’ebé ikus mai hamosu 12 Novembru, hodi loke matan mundu-nian ba situasaun polítika Timor-Leste nian”, tenik Vise Xefe Bankada FRETILIN, Francisco Miranda Branco ba Agência TATOLI, kuarta ne’e.

Nia haktuir, momentu ne’ebá parte barak mak kontribui hodi muda ema iha mundu tomak nia hanoin katak Timor-Leste iha situasaun krizi nia laran no presiza ajuda.

“Santo Padre rei rai Timor iha signifikadu polítika boot tebes tanba iha momentu ne’ebá akompañadu hosi mídia internasionál barak hodi fó-sai situasaun Timor-Leste nian ba mundu”, dehan nia.

Nune’e, nia husu Governu hamutuk ho Igreja no povu tomak hodi bele selebra hamutuk loron istóriku ida-ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here