Ministru Negósius Estranjeirus no Kooperasaun Dionísio da Costa Babo Soares. Imajen António Goncalves

DILI, 09 outubru 2019 (TATOLI)-Ministru Negósiu Estranjeiru no Kooperasaun (MNEK), Dionísio da Costa Babo Soares hateten katak kanselamentu viajen Prezidente Repúblika (PR) ba estranjeiru ne´e kompeténsia órgaun soberanu, Parlamentu Nasionál (PN).

“Ha’u lakohi komentáriu ba desizaun polítika sira ne’ebé mak órgaun soberania sira halo. Ne’e kompeténsia órgaun soberania nian, maibé normál iha nível internasionál kuandu ita ativu liu, ita engaja (empeña) liu maka nia vizibilidade ne’e maka’as tebes,” dehan Ministru Dionísio da Costa Babo Soares ba jornalista sira hafoin ramata enkontru Konsellu-Ministru iha Palásiu Governu, ohin.

Diplomata timoroan ne’e esplika, kuandu iha Primeiru-Ministru ka Prezidente Repúblika mak ba ne’e, nia valór ne’e akresentadu liu hanesan valór adisionál ne´e maka´as liu. “Hanesan Ministru Negósiu Estranjeiru, ha’u hanoin partisipasaun Primeiru-Ministru, Prezidente da Repúblika ou altas figura estadu sira ne’e, importante iha organizasaun internasionál sira”.

“Agora ita ko’alia fali prosedimentu konstitusionál, ida ne’ebé mak órgaun soberania, sira mak sei iha kompeténsia ba malu. Ne’ebé, ha’u labele komentáriu ba ida ne’e tanba ne’e kompeténsia órgaun soberania nian. Ministru labele dehan  fali katak ne’e di’ak ka la di’ak,” tenik Ministru Dionísio Babo.

 Aprezenta Proposta

Iha biban hanesan, Ministru Dionísio Babo perante profisionál komunikasaun sosiál sira  katak MNEK aprezenta proposta ida ba iha Konsellu-Ministru atu bele haree.

“Ita hanesan nasaun soberania ida, ita membru Nasaun Unida, durante ne’e ita kuandu ba iha enkontru multilaterál sira ne’e, ita, ema kandidatu ba fatin ruma, nasaun seluk hato’o, ita mak hanesan apoiu de’it. Ita tinan-tinan apoia ema, ne’ebé agora iha pozisaun barak ne’ebé tinan-tinan sira loke iha Nasaun Unida,” informa Ministru Dionísio Babo Soares.

Nia fó ezemplu katak pozisaun hanesan Vise-Prezidente Asembleia Jerál, oinsá mak nasaun ida bele tama iha Konsellu Internasionál Direitu Umanu nian, sidadaun nian depois ho konferénsia internasionál sira.

“Agora iha pozisaun barak nasaun barak iha mundu ne’e, balun ki’ik liu ita mós bele aprezenta kandidatura, nusa mak Timor-Leste labele. Ne’ebé, ha’u hanoin ita-nia engazamentu, ita-nia partisipasaun iha nível multilaterál ne’e labele ba tuir seminariu, tuir konferénsia mas tenke ba lidera,” dehan Ministru Dionísio Babo.

Diplomata timoroan ne’e informa tan: “Husu ba Konsellu-Ministru sebele endossa (apoia), endossa proposta Ministériu Negosiu Estranjeirus nian no la iha membru ida mak dehan la apoiu. Ne’ebé, Ministeriu Negósiu Estranjeiru sei diskute fali ho Ministeriu sira seluk depois endossa ida ne’e, sei diskuti haree to´ok pozisaun ida ne’ebé mak Timor-Leste bele aplika, para ba tuur iha organizasaun relasaun internasionál sira ne’e”.

Jornalista : Nelia Fernandes

 Editór      : Rafy Belo

HAKEREK NO HATÁN

Please enter your comment!
Please enter your name here