Estudante SACROJES. Foto FB sacrojes

DILI, 09 Outubru 2019 (TATOLI)—Vise Diretór Eskola Ensinu Sekundária Sagrado Coração de Jesus, Candido Belo da Luz, hateten, estudante terseiru ano iha eskola Katólika SACORJES preparadu atu tuir ezame nasionál ne’ebé sei realiza iha loron 14 outubru tinan ida ne’e.

Vise diretór ne’e haktuir, eskola refere iha manuál rasik tanba ne’e iha manuál ne’e sira hamosu pra-ezame hanesan parte ida hodi prepara estudante sira molok partisipa iha ezame nasionál.

“Kona-ba ezame nasionál, ohin loron, ami tama ona ba iha pra-ezame. Ami hamosu pra-ezame tanba  iha ami-nia manuál,  bainhira atu tama ba ezame nasionál iha pra-ezame ne’e review (revizaun) fila fali matéria hosi primeiru,  segundu no terseiru ano ne’ebé sira hetan ona,” dehan Candido Bello da Luz ba Ajénsia TATOLI liuhusi entrevista iha nia knaar fatin, Becora, Dili, kuarta (09/10/2019).

Nia hatutan, objetivu hosi kria pre-ezame ne’e atu labarik  sira bele ke´e fila fali matéria sira ne’ebé sira aprende iha primeiru no segundu ano, hodi nune’e bele kompete fali iha ezame nasionál ida ne’ebé maka atu akontese ne’e ho di’ak.

“Dalaruma SACROJES nia nilai murni iha pra-ezame ne’e, ita haree katak estudante sira-nia valór ki´ik hela. Maibé kompete iha ezame nasionál, sira-nia valór aas hotu. Ne’e maka hosi matéria pra-ezame ne’e maka sira simu sertifikadu rua. Ida pra-ezame ne’e hosi SACROJES no Ezame Nasionál hosi Ministériu Edukasaun,” vise diretór ne’e eplika.

Entretantu, nia informa, totál estudante terseiru ano ne’ebé sei partisipa iha ezame nasionál iha tinan ida ne’e mak estudante hamutuk ema na’in 178.

Jornalista: Nelia Borges

Editór       : Rafy Belo

HAKEREK NO HATÁN

Please enter your comment!
Please enter your name here