Diretora Nasionál Monitorizasaun Jestaun Patrimóniu Estadu (DNMJPE), Timotea Marques. Imajen/Mídia MF.

DILI, 09 outubru 2019 (TATOLI) – Diresaun Nasionál Monitorizasaun Jestaun Patrimóniu Estadu (DNMJPE) Ministériu Finansa ( MF) kompleta ona nia ezisténsia ba dala-lima ho progresu.

DNMJPE estabelese iha governasaun dalimak, iha 4 outubru 2014, tuir polítika Governu nian atu redús despeza iha área manutensaun maka iha tinan lima liubá MF liuhusi DNMJPE estabelese Ofisina Nasionál ida ho karater hanesan ofisina pilotu hodi bele mós garante kualidade no minimiza despeza Estadu nian.

Diretora DNMJPE, Timotea Marques, afirma Ofisina Nasionál harii iha momentu ne’ebá ministériu no instituisaun tolu maka sai membru mak Ministériu Finansa, Sekretáriu Estadu Seguransa atuál Ministériu Interiór, no Provedoria Direitu Umanu no Justisa (PDHJ, sigla portugés). Ho instituisaun tolu ne’e konsege lori ofisina ne’e atinji duni objetivu Governu nian kona-ba garante kualidade no redús despeza Estadu.

Timotea dehan dezde estabelese Ofisina Nasionál ne’e konsege expande ona ba liña ministeriál sira hamutuk 17 maka agora daudaun sai ona membru Ofisina Nasionál ho totál viatura ne’ebé rejista hamutuk unidade 816 hodi ofisina ne’e atende servisu reparasaun.

“Tan ne’e hakarak aprezenta katak ho estabelesimentu ne’e investimentu no preparasaun hosi diresaun ne’e esforsu hodi atinji duni objetivu”, dehan Timotea Marques iha selebrasaun aniversáriu Ofisina Nasionál no lansamentu Sistema Informasaun Ofisina Nasionál iha Balidi, ohin.

Diretora Nasionál ne’e esklarese mekániku sira ne’ebé servisu iha ofisina ne’e mai hosi eis mekániku United Nations (UN) ou Forsa Pás nian bainhira entrega fali kampaun refere ba iha Governu, nune’e halo fali rekrutamentu ba mekánika sira ne’e hodi hala’o servisu.

Tanba ne’e, mekánika ne’ebé hala’o kna’ar iha ofisina refere hamutuk na’in-20 fahe ba área espesialidade, iha área produsaun na’in-15 no área ferramenta no administrasaun na’in-lima, no na’in-10 funsionáriu públiku permanente ne’ebé apoia.

Atu hasa’e koñesimentu no garante kualidade maka Governu kada tinan haruka mekánika sira ne’e bá tuir formasaun no prátika iha ofisina ne’ebé konsidera kualidade no adekuada hanesan iha Indonézia.

Timotea Marques haktuir tan, kampaun ofisina ho luan ektare rua, maibé presiza dezenvolve liután hodi fó atendimentu di’ak liután. Iha kampaun ne’e kompleta ho fatin atendimentu, inpesaun, produsaun no armazein ba ekipamentu.

“Durante ne’e Governu investe ona osan hamutuk $657.739 ba ekipamentu sira ne’ebé uza iha ofisina nasionál. Atu dehan katak ekipamentu ne’ebé iha tuir duni padraun ofisina nian hanesan lift (hasa’e karreta) bainhira sira halo manutensaun, iha mós ekipamentu eletróniku hanesan GPS ka komputadór ne’ebé bele halo teste ba problema karreta nian. Iha mós ekipamentu eletróniku ba halo balansu ba roda”, haktuir Timotea.

Ho ekipamentu no servisu sira iha progresu ba Ofisina Nasionál durante ne’e. Tuir dadus katak karreta ne’ebé rejistadu hodi halo manutensaun hamutuk unidade 985, halo reparasaun diretamente hamutuk 817, enkuantu halo manutensaun iha ofisina kontratadu iha karreta 168 no mós atende emerjénsia iha unidade 23. Ida ne’e hatudu katak halo manutensaun iha ofisina nasional porsentu 83 no ofisina kontratadu porsentu 17.

Timotea salienta, hosi dadus ne’e hahú iha 2014 to’o mai 2015 rekomendasaun maka’as liu ba ofisina kontratadu kompara manutensaun iha Ofisina Nasionál, maibé iha 2019, atendimentu barak liu maka iha ofisiina nasionál, no hahú hapara rekomendasaun ba ofisina kontratadu.

Hosi dadus ne’e hatudu katak kustu ba manutensaun iha ofisina nasionál ho porsentu 83 ne’e ho totál $194.648 kompara iha ofisina kontratadu ho de’it porsentu 17 kustu reparasaun ho totál $167.220.

Notísia relevante : DNMJPE Estabelese SION Hodi Evita Irregularidade ba Manutensaun Karreta Estadu

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here